ကာလမေဃီ မုန်တိုင်း သောကြာနေ့တွင် ထိုင်းနိုင်ငံသို့ ရောက်ရှိမည်

ကာလမေဃီ (Kalmaegi) တိုင်ဖွန်းမုန်တိုင်းသည် ကြာသပတေးနေ့ နံနက်အစောပိုင်းတွင် တောင်တရုတ်ပင်လယ် (South China Sea) ကို ဖြတ်ကျော်နေပြီး သောကြာနေ့တွင် ဗီယက်နမ်အလယ်ပိုင်းသို့ ရောက်ရှိကာ အားလျော့သွားပြီးနောက် ထိုင်းနိုင်ငံ အရှေ့မြောက်ပိုင်းသို့ ထိုနေ့နှောင်းပိုင်းတွင် ရောက်ရှိလာမည် ဟု မိုးလေဝသဌာနက ထုတ်ပြန်ခဲ့သည်။

မုန်တိုင်း၏ လမ်းကြောင်းနှင့် အင်အား

မိုးလေဝသဌာန ညွှန်ကြားရေးမှူးချုပ် Sugunyanee Yavinchan (ဆူဂွန်ယနီး ယာဗင်ချန်) ၏ ပြောကြားချက်အရ တိုင်ဖွန်းမုန်တိုင်းသည် ကြာသပတေးနေ့ နံနက် ၄ နာရီတွင် ဗီယက်နမ်အလယ်ပိုင်း၊ ကွီနွန်း (Quy Nhon) ကမ်းရိုးတန်းမြို့၏ အရှေ့တောင်ဘက် ၅၁၀ ကီလိုမီတာခန့် အကွာ တောင်တရုတ်ပင်လယ်တွင် တည်ရှိနေသည်။ ၎င်း၏ ဗဟိုချက်အနီးတွင် လေတိုက်နှုန်းမှာ တစ်နာရီလျှင် ကီလိုမီတာ ၁၅၀ ခန့် ရှိသည်။

မုန်တိုင်းသည် လာအိုနိုင်ငံကို ဖြတ်ကျော်ပြီးနောက် အပူပိုင်းမုန်တိုင်းငယ် (tropical storm) နှင့် မုန်တိုင်းငယ် (depression) အဖြစ် အားလျော့သွားမည်ဖြစ်သည်။မုန်တိုင်းသည် သောကြာနေ့တွင် ထိုင်းနိုင်ငံ၊ ဥဘွန်ရတ်ချထာနီ (Ubon Ratchathani)သို့ ရောက်ရှိမည်ဖြစ်ပြီး နောက်ပိုင်းတွင် လေဖိအားနည်းရပ်ဝန်းအဖြစ်သို့ ပြောင်းလဲသွားမည်ဖြစ်သည်။

မုန်တိုင်း၏ သက်ရောက်မှုကြောင့် သောကြာနေ့မှ တနင်္ဂနွေနေ့အထိ နိုင်ငံ၏ အောက်ပါဒေသများတွင် မိုးပိုများလာပြီး သီးခြားနေရာများတွင် မိုးကြီးခြင်းမှ အလွန်အမင်း မိုးကြီးခြင်းအထိ ရွာသွန်းနိုင်သည်-

• အရှေ့မြောက်ပိုင်း (Northeast)
• အရှေ့ပိုင်း (East)
• ဘန်ကောက်မြို့တော်နှင့် ဝန်းကျင် (Greater Bangkok) အပါအဝင် အလယ်ပိုင်းလွင်ပြင် (Central Plains)
• မြောက်ပိုင်း (North)

ထိုဒေသများတွင် ထိုကာလအတွင်း ရေတိုက်စားမှုများ၊ တောရေလျှံမှုများ နှင့် ရေစီးကြောင်းများ လျှံတက်မှုများ ဖြစ်ပေါ်နိုင်ချေရှိသည်။

တိုင်ဖွန်းမုန်တိုင်း ကာလမေဃီသည် ဖိလစ်ပိုင်အလယ်ပိုင်းတွင် အဖျက်စွမ်းအားကြီးမားသော ရေကြီးရေလျှံမှုများကို ဖြစ်ပေါ်စေခဲ့ပြီးနောက် ကြာသပတေးနေ့အထိ ရရှိသည့် တရားဝင် အချက်အလက်များအရ လူ ၁၄၀ ဦး သေဆုံး ခဲ့ပြီး ၁၂၇ ဦး ပျောက်ဆုံး နေဆဲဖြစ်သည်။

မစ္စ Sugunyanee က ပင်လယ်ကြမ်းတမ်းမှုကြောင့် ကြာသပတေးနေ့နှင့် သောကြာနေ့တို့တွင် အန်ဒမန်ပင်လယ်ထဲသို့ မထွက်ရန် လှေငယ်များအား သတိပေး အကြံပြုထားသည်။

Source: Bangkok Post