ခရစ္စတီယာနို ရော်နယ်ဒို သည် ဘောလုံးလောကတွင် ပထမဆုံးသော ဘီလျံနာ ကစားသမား ဖြစ်လာကြောင်း သတင်းများက ဖော်ပြသည်။ အသက် ၄၀ နှစ်အရွယ် တိုက်စစ်မှူး၏ ငွေကြေးတိုးတက်မှုသည် ၂၀၂၃ ခုနှစ် ဇွန်လတွင် ဆော်ဒီကလပ် အလ် နက်ဆာ (Al-Nassr) နှင့် စာချုပ်သစ်ချုပ်ဆိုပြီးနောက် ဖြစ်ပေါ်လာခြင်းဖြစ်ပြီး ၎င်းစာချုပ်တန်ဖိုးမှာ ဒေါ်လာ သန်း ၄၀၀ ကျော်ရှိကြောင်း သိရသည်။
၂၀၂၃ ခုနှစ်တွင် မန်ချက်စတာယူနိုက်တက်မှ အလ် နက်ဆာသို့ ပြောင်းရွှေ့ခြင်းသည် ရော်နယ်ဒိုအား ဘောလုံးသမိုင်းတွင် လစာအများဆုံး ကစားသမားဖြစ်စေခဲ့ပြီး ၎င်း၏ နှစ်စဉ်လစာသည် ပေါင် ၁၇၇ သန်း (ဒေါ်လာ ၂၃၇.၅၂ သန်း) အပြင် ဘောနပ်စ်များ နှင့် ကလပ်ရှယ်ယာ ၁၅% ကို ရရှိခဲ့သည်။
ထိပ်တန်းအားကစားသမားများထဲမှ တစ်ဦး
ရော်နယ်ဒို၏ ဘီလျံနာအဆင့်အတန်းသည် ဘတ်စကက်ဘော ကစားသမားကြီးများဖြစ်သည့် မိုက်ကယ် ဂျော်ဒန် (Michael Jordan)၊ မက်ဂျစ် ဂျွန်ဆင် (Magic Johnson)၊ လီဘရွန် ဂျိမ်းစ် (LeBron James)၊ ဂေါက်သီးရိုက်သမား တိုင်းဂါး ဝုဒ် (Tiger Woods) နှင့် တင်းနစ်ကစားသမား ရော်ဂျာ ဖက်ဒါရာ (Roger Federer) တို့ ပါဝင်သည့် ရှားပါးသော အားကစားသမားအုပ်စုထဲသို့ ရောက်ရှိသွားစေသည်။
နှိုင်းယှဉ်ချက်အနေဖြင့် အာဂျင်တီးနားနှင့် အင်တာ မိုင်ယာမီ တိုက်စစ်မှူး လီယွန်နယ် မက်ဆီ (Lionel Messi) သည် ၎င်း၏ ကစားသမားဘဝတစ်လျှောက်တွင် အခွန်မဆောင်မီ လစာအဖြစ် ဒေါ်လာ သန်း ၆၀၀ ကျော် ရရှိထားသည်။
အနားယူရန် အစီအစဉ် မရှိသေး
ရော်နယ်ဒိုသည် မကြာမီ အနားယူရန် အစီအစဉ်မရှိကြောင်း အရိပ်အမြွက် ပြောကြားခဲ့သည်။
အင်္ဂါနေ့က ကျင်းပသော ပေါ်တူဂီဘောလုံးပွဲ ဂါလာအခမ်းအနားတွင် ၎င်းက- “ကျွန်တော့်မှာ ဒီအတွက် စိတ်အားထက်သန်မှု ရှိနေတုန်းပါပဲ။ ကျွန်တော့်မိသားစုက အနားယူဖို့ အချိန်တန်ပြီလို့ ပြောကြတယ်။ ဂိုး ၉၀၀ ကျော်သွင်းပြီးပြီဆိုရင် ဂိုး ၁၀၀၀ ဘာလို့ ထပ်သွင်းချင်တာလဲလို့ မေးကြပါတယ်။ ဒါပေမဲ့ ကျွန်တော့်စိတ်ထဲမှာတော့ အဲဒီလို မတွေးပါဘူး။ ကျွန်တော် ကောင်းမွန်တဲ့ ကစားပုံတွေကို ပြသနေတုန်းပါပဲ၊ ကျွန်တော့်ကလပ်နဲ့ လက်ရွေးစင်အသင်းကိုလည်း ကူညီနေပါတယ်။ ဘာလို့ မဆက်ကစားသင့်တော့တာလဲ။ ကျွန်တော် အနားယူတဲ့အခါမှာတော့ ကိုယ့်ကိုယ်ကိုယ် အားလုံး ပေးဆပ်ခဲ့လို့ စိတ်ကျေနပ်မှု အပြည့်အဝ ခံစားရမယ်လို့ ယုံကြည်ပါတယ်။ ကျွန်တော် ကစားဖို့ နှစ်အနည်းငယ်ပဲ ကျန်တော့တယ်ဆိုတာ သိပါတယ်။ ဒါပေမဲ့ ကျန်တဲ့ အချိန်လေးတွေကို အပြည့်အဝ ပျော်ရွှင်စွာ ကစားသွားရပါမယ်” ဟု ပြောကြားခဲ့သည်။
Source: The Nation Thailand
