ယနေ့ မွန်းလွဲ ၁ နာရီဝန်းကျင်ခန့်တွင် ဆာမွတ်ပရာကန်ခရိုင်၊ စူခုမ်ဗစ်လမ်းမကြီးပေါ်ရှိ ဘန်းပူးစက်မှုဇုန် (Bang Pu Industrial Estate) အဝင်တံတားအနီးတွင် ကွန်တိန်နာကားတစ်စီးကြောင့် လျှပ်စစ်တိုင်များ အစီအရီ လဲကျမှု ဖြစ်ပွားခဲ့သည်။
ကွန်တိန်နာကားသည် တံတားပေါ်မှ ဖြတ်သန်းစဉ် နိမ့်ကျနေသော ဆက်သွယ်ရေး ကေဘယ်ကြိုးများကို မတော်တဆ ငြိမိခဲ့ခြင်းဖြစ်သည်။ကားသည် အရှိန်မသတ်ဘဲ ဆက်လက်မောင်းနှင်သွားသဖြင့် ကြိုးများ တင်းအားဖြစ်ကာ ၁၂ မီတာခန့် မြင့်သော လျှပ်စစ်တိုင်ပေါင်း ၇၀ ကျော်မှာ ဒိုမီနိုကဲ့သို့ တစ်တိုင်ပြီးတစ်တိုင် ၂ ကီလိုမီတာခန့် အကွာအဝေးအထိ ပြိုင်တူလဲကျသွားခဲ့သည်။လျှပ်စစ်တိုင်များအပြင် ၎င်းတို့ပေါ်တွင် တပ်ဆင်ထားသည့် ထရန်စဖော်မာ (Transformers) များနှင့် လျှပ်စစ်ဖြန့်ဖြူးရေး ပစ္စည်းများလည်း အကြီးအကျယ် ပျက်စီးသွားသည်။ ကံကောင်းထောက်မစွာဖြင့် လူတစ်စုံတစ်ရာ ထိခိုက်ဒဏ်ရာရမှု မရှိခဲ့ပါ။
ဤဖြစ်စဉ်ကြောင့် အနီးအနားရှိ လူနေအိမ်များနှင့် စက်မှုဇုန်အတွင်း နေရာအတော်များများတွင် လျှပ်စစ်မီးများ ပြတ်တောက်သွားခဲ့သည်။ဘန်ကောက်မြို့တော် လျှပ်စစ်အာဏာပိုင်အဖွဲ့ (MEA) မှ ဝန်ထမ်း ၂၀၀ ကျော်သည် အခင်းဖြစ်နေရာသို့ ချက်ချင်းရောက်ရှိလာပြီး လဲကျနေသော တိုင်များကို ဖယ်ရှားခြင်းနှင့် အသစ်လဲလှယ်ခြင်းများကို ဆောင်ရွက်နေသည်။ ယနေ့ ညသန်းခေါင်အချိန်တွင် မီးပြန်ပေးနိုင်ရန် ရည်မှန်းထားသည်။ပျက်စီးဆုံးရှုံးမှု တန်ဖိုးမှာ ဘတ်သန်းပေါင်းများစွာ (ခန့်မှန်းခြေ ဘတ် ၁၀ သန်းခန့်) ရှိနိုင်ကြောင်း သိရသည်။
Source: Thaiger
