ကုန်ကျစရိတ်ဆိုင်ရာ ကိစ္စရပ်များကြောင့် ဆန္ဒပြနေစဉ် ရဲကားဖြင့်တိုက်မိ၍ ဆိုင်ကယ်တက္ကစီယာဉ်မောင်းတစ်ဦး သေဆုံးပြီးနောက် အင်ဒိုနီးရှားနိုင်ငံ၏ မြို့တော် ဂျကာတာတွင် ဆန္ဒပြမှုများ ပြန်လည်စတင်ခဲ့သည်။
အာဖန် ကုရနီယာဝန်သည် လစာတိုးပေးရန်၊ အခွန်လျှော့ချရန်နှင့် နိုင်ငံရေးသမားများအတွက် ထောက်ပံ့ကြေးများ ဖယ်ရှားရန် စုရုံးဆန္ဒပြသူများကို အဓိကရုဏ်းနှိမ်နင်းရေးရဲများက လူစုခွဲနေစဉ် အင်ဒိုနီးရှားပြည်သူ့လွှတ်တော်အပြင်ဘက်တွင် သံချပ်ကာရဲကားတစ်စီးက ဝင်တိုက်ခဲ့သောကြောင့် ကြာသပတေးနေ့က သေဆုံးခဲ့ခြင်းဖြစ်သည်။
သောကြာနေ့တွင် ဆိုင်ကယ်တက္ကစီယာဉ်မောင်းများသည် ကုရနီယာဝန်၏ သေဆုံးမှုအတွက် ဆန္ဒပြရန် ဂျကာတာ မိုဘိုင်းတပ်ဖွဲ့ဌာနချုပ်အပြင်ဘက်တွင် စုရုံးခဲ့ကြပြီး၊ ကျောင်းသားများက ဆန္ဒပြသူများကို မြို့တော်ရှိ ရဲဌာနချုပ်အပြင်ဘက်တွင် စုရုံးချီတက်ကြရန် တိုက်တွန်းခဲ့သည်။
သမ္မတ ပရာဘိုဝို ဆူဘီယန်တိုက အခြေအနေကို ထိန်းသိမ်းရန် တောင်းဆိုခဲ့ပြီး ကုရနီယာဝန်၏ သေဆုံးမှုအတွက် ဝမ်းနည်းကြောင်းပြောကြားကာ အဆိုပါဖြစ်ရပ်ကို သေချာစွာစုံစမ်းစစ်ဆေးရန် အမိန့်ပေးခဲ့သည်။
“အရာရှိတွေရဲ့ လုပ်ရပ်လွန်ကဲမှုကြောင့် ကျွန်တော် တုန်လှုပ်မိပြီး စိတ်ပျက်မိပါတယ်” ဟု ပရာဘိုဝိုက ဗီဒီယိုမက်ဆေ့ချ်တွင် ပြောကြားခဲ့သည်။ “ကျွန်တော် သေချာပြီး ပွင့်လင်းမြင်သာတဲ့ စုံစမ်းစစ်ဆေးမှုတစ်ခု လုပ်ဆောင်ဖို့ အမိန့်ပေးခဲ့ပါတယ် … ပါဝင်ပတ်သက်တဲ့ အရာရှိတွေကို အရေးယူရပါမယ်” ဟုလည်း ထပ်လောင်းပြောကြားခဲ့သည်။
ကြာသပတေးနေ့ ဆန္ဒပြပွဲသည် ညပိုင်းအထိ ဆက်လက်ဖြစ်ပွားခဲ့ရာ ဒေသခံမီဒီယာများက အဓိကရုဏ်းနှိမ်နင်းရေးရဲများသည် လူများကို လူစုခွဲရန် မျက်ရည်ယိုဗုံးများ ပစ်ခတ်ပြီး မီးသတ်ပိုက်များ အသုံးပြုခဲ့ကြောင်း ဖော်ပြခဲ့သည်။
မြို့တော်ရဲချုပ် အာဆစ် အယ်ဒီ ဆူဟေရီက ပဋိပက္ခများအတွင်း Gojek နှင့် Grab ကုမ္ပဏီတို့အတွက် အငှားယာဉ်မောင်းအဖြစ် လုပ်ကိုင်နေသည့် ကုရနီယာဝန်ကို သံချပ်ကာရဲကားတစ်စီးက တိုက်မိပြီး သေဆုံးခဲ့ကြောင်း ပြောကြားခဲ့သည်။
ယာဉ်မောင်း၏ မိသားစုနှင့် ဆိုင်ကယ်ယာဉ်မောင်းများအသင်းတို့က ကုရနီယာဝန်သည် ဆန္ဒပြပွဲတွင် ပါဝင်ပတ်သက်ခြင်းမရှိကြောင်း ပြောဆိုခဲ့သည်။
“ရဲချုပ်တစ်ဦးအနေနဲ့နဲ့ တပ်ဖွဲ့တစ်ခုလုံးကိုယ်စား အနက်ရှိုင်းဆုံး တောင်းပန်ပါတယ်၊ ဝမ်းနည်းကြောင်းလည်း ဖော်ပြပါတယ်” ဟု သူက ကြာသပတေးနေ့ ညနေပိုင်း သတင်းစာရှင်းလင်းပွဲတွင် ပြောကြားခဲ့သည်။
ဤသီတင်းပတ်အတွင်း ကျောင်းသားနှင့် အလုပ်သမားများအပါအဝင် လူထောင်ပေါင်းများစွာသည် ဂျကာတာနှင့် အခြားမြို့ကြီးများ၏ လမ်းများပေါ်တွင် ဆန္ဒပြခဲ့ကြသည်။ နိုင်ငံ၏ အချို့ဒေသများတွင် အနိမ့်ဆုံးလုပ်ခထက် အဆ ၂၀ ပိုများသော နိုင်ငံရေးသမားများအတွက် အိမ်ရာထောက်ပံ့ကြေးအသစ်ကို ဆန္ဒပြနေခြင်းဖြစ်သည်။
ဆန္ဒပြသူများသည် လစာနည်းပါးခြင်း၊ အစိုးရရန်ပုံငွေဖြတ်တောက်မှုများနှင့် အထည်ချုပ်လုပ်ငန်းတွင် အလုပ်အကိုင်လျှော့ချမှုများကိုလည်း ဆန္ဒပြနေကြသည်။
What Is Up, Indonesia? ဆိုသည့် လူမှုမီဒီယာပလက်ဖောင်းကို ပူးတွဲတည်ထောင်သူ အဘီဂေးလ် လီမူရာက အဆိုပါဆန္ဒပြမှုများသည် “နိုင်ငံတစ်ဝန်းတွင် စီးပွားရေးသာမက နိုင်ငံရေးအရပါ စိတ်ပျက်မှုများ လပေါင်းများစွာ စုစည်းလာခြင်း၏ အထွတ်အထိပ်ဖြစ်သည်” ဟု Al Jazeera သို့ ပြောကြားခဲ့သည်။
“ကျွန်တော်တို့ဟာ စီးပွားရေး ပိုဆိုးရွားလာနေပြီး အလုပ်အကိုင်ဈေးကွက် ပြိုလဲနေတဲ့ အခြေအနေမှာ ရောက်နေပါတယ်၊ ထောင်နဲ့ချီတဲ့ လူတွေ အလုပ်ထုတ်ခံခဲ့ရပါတယ်။ ဒီလိုမျိုးလူတွေက စာနာမှုနဲ့ မကြုံရတဲ့အပြင် တခါတရံမှာ ရိုင်းစိုင်းပြီး စော်ကားတဲ့ တုံ့ပြန်မှုတွေနဲ့တောင် ရင်ဆိုင်နေရပါတယ်” ဟု သူမက ပြောသည်။
လွတ်ငြိမ်းချမ်းသာခွင့် အပြည်ပြည်ဆိုင်ရာ အင်ဒိုနီးရှား၏ အမှုဆောင်ဒါရိုက်တာ အူစမန် ဟာမစ်က ဆန္ဒပြသူများသည် ရဲ၏ ရက်စက်ကြမ်းကြုတ်မှုနှင့် ရဲက ဤသီတင်းပတ်အတွင်း ဆန္ဒပြမှုများကို ပြင်းထန်စွာ တုံ့ပြန်မှုတို့ကဲ့သို့ ကြာမြင့်နေပြီဖြစ်သော ကိစ္စရပ်များကြောင့်လည်း ဒေါသထွက်နေကြသည်ဟု ပြောကြားခဲ့သည်။
“ဆိုင်ကယ်တက္ကစီယာဉ်မောင်းရဲ့ ဖြစ်ရပ်ဟာ ရဲရဲ့ အင်အားအလွန်အကျွံသုံးမှုတွေထဲက ဖြစ်ရပ်တစ်ခုပဲဖြစ်ပါတယ်။ အင်ဒိုနီးရှား၊ အနောက်ပါပူဝါအပါအဝင် နိုင်ငံတစ်ဝန်းမှာ ဒီလိုကိစ္စတွေ အများကြီးရှိပါတယ်” ဟု သူက Al Jazeera သို့ ပြောသည်။ “သေနတ်အသုံးပြုမှု၊ ဥပဒေမဲ့ဖမ်းဆီးထိန်းသိမ်းမှု၊ နှိပ်စက်ညှဉ်းပန်းမှုနဲ့ တရားစီရင်ရေးပြင်ပ သတ်ဖြတ်မှုတွေလိုမျိုး ယုံကြည်ရတဲ့ အစီရင်ခံစာတွေကို ကျွန်တော်တို့ အဆက်မပြတ် ရရှိနေပါတယ်”။
ဂျကာတာ ရဲဌာနချုပ်နှင့် ဥပဒေပြုလွှတ်တော်အပြင်ဘက်တွင် ကြီးမားသော ဆန္ဒပြပွဲများ ပြုလုပ်ခဲ့ပြီး The Jakarta Post သတင်းစာကလည်း ဆန္ဒပြသူများသည် အများသုံးအဆောက်အအုံများကို ဖျက်ဆီးကာ ကားအများအပြားကို မီးရှို့ခဲ့ကြောင်း ဖော်ပြခဲ့သည်။
Source: Al Jazeera
