ဝန်ကြီးချုပ်ဟောင်း ထက်ဆင် ရှင်နာဝပ်ထရာသည် ထောင်ဒဏ်ကျခံမည့်အစား ဆေးရုံတွင် အချိန်ကြာမြင့်စွာ နေထိုင်ခဲ့မှုနှင့် ပတ်သက်၍ တရားရုံးချုပ်၏ စီရင်ချက်မချမီ တစ်ရက်အလိုဖြစ်သည့် တနင်္လာနေ့ ညနေပိုင်းတွင် ၎င်း၏ ကိုယ်ပိုင်ဂျက်လေယာဉ်ဖြင့် ဒွန်မောင်း လေဆိပ်သို့ ပြန်လည်ရောက်ရှိခဲ့သည်။
၎င်း၏ Bombardier Global 7500 ဂျက်လေယာဉ်သည် တနင်္လာနေ့ နံနက်ပိုင်းတွင် (UAE) မှ စင်ကာပူသို့ ရောက်ရှိပြီးနောက် ဒွန်မောင်းလေဆိပ်သို့ ညနေ ၂:၅၄ နာရီတွင် ဆင်းသက်ခဲ့ကြောင်း သိရသည်။
၎င်းစီးနင်းသည့် လိုင်စင်နံပါတ် Por Ror 195 Bangkok ဖြစ်သော အနက်ရောင် Mercedes-Maybach ကားသည် ညနေ ၂:၅၈ နာရီတွင် ကိုယ်ပိုင်ဂျက်လေယာဉ်ဂိတ်သို့ ရောက်ရှိလာပြီး ၃:၀၅ နာရီတွင် ထွက်ခွာသွားခဲ့သည်။
ပြီးခဲ့သည့် ရက်သတ္တပတ်က ထက်ဆင်သည် ၂၀၂၃ ခုနှစ်အလယ်ပိုင်းမှ ၂၀၂၄ ခုနှစ်အစောပိုင်းအထိ ထောင်ထဲတွင်မနေဘဲ ဆေးရုံ၌ အချိန်ကြာမြင့်စွာ နေထိုင်ခဲ့မှုနှင့်ပတ်သက်သော အမှုအတွက် အင်္ဂါနေ့တွင် တရားရုံးချုပ်သို့ ကိုယ်တိုင်လာရောက်၍ စီရင်ချက်ကို နားထောင်မည်ဖြစ်ကြောင်း ကြေညာခဲ့သည်။
ယခင်က ဝန်ကြီးချုပ်ဟောင်း ဖဲ့သုန်တန် ရှင်နာဝပ်ထရာ၏ ဖခင်ဖြစ်သူသည် ဆေးစစ်မှုခံယူရန်အတွက် ကြာသပတေးနေ့ညက စင်ကာပူသို့ ထိုင်းနိုင်ငံမှ ထွက်ခွာခဲ့ကြောင်း ပြောကြားခဲ့သည်။ သို့သော်လည်း ဘန်ကောက်တွင် လူဝင်မှုကြီးကြပ်ရေးဆိုင်ရာ နှောင့်နှေးမှုတစ်ခုကြောင့် ညပိုင်းပိတ်ချိန်မတိုင်မီ Seletar လေဆိပ်သို့ မဆင်းသက်နိုင်တော့သည့်အတွက် ၎င်း၏လေယာဉ်ကို ရုတ်တရက် ဒူဘိုင်းသို့ လမ်းကြောင်းပြောင်းခဲ့သည်ဟု ၎င်းက ဆိုသည်။
တရားရုံးချုပ်၏ နိုင်ငံရေးရာထူးတာဝန်ယူခဲ့သူများဆိုင်ရာ ရာဇဝတ်မှုဌာနခွဲက ၎င်းကို အင်္ဂါနေ့တွင် စီရင်ချက်ချမှတ်ရန်အတွက် ကိုယ်တိုင်လာရောက်ရန် အမိန့်ထုတ်ပြန်ထားသည်။
အသက် ၇၆ နှစ်ရှိပြီဖြစ်သော ထက်ဆင်သည် ၁၅ နှစ်ကျော်ကြာ နိုင်ငံခြားတွင် ကိုယ့်ဖာသာကိုယ် ပြည်နှင်ဒဏ်ခံယူနေပြီးနောက် ၂၀၂၃ ခုနှစ်၊ သြဂုတ်လ ၂၂ ရက်နေ့တွင် ထိုင်းနိုင်ငံသို့ ပြန်လည်ရောက်ရှိလာခဲ့သည်။
၎င်းသည် Pheu Thai ပါတီ၏ ခေါင်းဆောင်နှင့် ဘီလျံနာတစ်ဦးဖြစ်ပြီး ၂၀၀၆ ခုနှစ်မတိုင်မီ ဝန်ကြီးချုပ်အဖြစ် တာဝန်ထမ်းဆောင်စဉ်က အာဏာအလွဲသုံးစားလုပ်မှုနှင့် အကျိုးစီးပွားပဋိပက္ခမှုတို့အတွက် အမှုသုံးခုတွင် ထောင်ဒဏ် ၈ နှစ် ချမှတ်ခံခဲ့ရသည်။ နောက်ပိုင်းတွင် တော်ဝင်ကရုဏာဖြင့် တစ်နှစ်သို့ ပြစ်ဒဏ်လျှော့ပေါ့ပေးခဲ့သည်။
၎င်းရောက်ရှိပြီးပြီးချင်းပင် ဘန်ကောက် အကျဉ်းထောင်သို့ ပို့ဆောင်ခံခဲ့ရသော်လည်း ထိန်းသိမ်းခံရပြီး ၁၃ နာရီအကြာ ထိုညတွင်ပင် ရဲဆေးရုံချုပ်သို့ ပြောင်းရွှေ့ခဲ့သည်။
မန်ချက်စတာစီးတီး ဘောလုံးအသင်းပိုင်ရှင်ဟောင်းသည် ၂၀၂၄ ခုနှစ်အစောပိုင်းတွင် အထူးအခွင့်အရေးရရှိခဲ့သည်ဆိုသော မေးခွန်းများကြားမှ လွှတ်ပေးခံရသည်အထိ ဆေးရုံ၌သာ ဆက်လက်နေထိုင်ခဲ့ကြောင်းသိရပါသည်။
Source: Bangkok Post
