လက်ရှိ ခရီးသွားရာသီ အထွတ်အထိပ်ကာလအတွင်း ခရီးသွားကုမ္ပဏီအချို့က နိုင်ငံခြားသားများကို ဧည့်လမ်းညွှန်များအဖြစ် ငှားရမ်းထားကြောင်း သတင်းများရရှိပြီးနောက် အလုပ်သမားဝန်ကြီး Treenuch Thienthong (ထရီနွတ် ထီယန်ထောင်) သည် ထိုင်းနိုင်ငံတွင် တရားမဝင် ဧည့်လမ်းညွှန်အဖြစ် လုပ်ကိုင်နေသော နိုင်ငံခြားသားများကို တင်းကျပ်စွာ နှိမ်နင်းရန် အမိန့်ပေးလိုက်သည်။
အလုပ်သမားဝန်ကြီးဌာန၏ စည်းမျဉ်းများအရ ဧည့်လမ်းညွှန်နှင့် ခရီးသွားလုပ်ငန်းကြီးကြပ်သူ အလုပ်အကိုင်များသည် ထိုင်းနိုင်ငံသားများအတွက်သာ သီးသန့်ထားရှိသော အလုပ်အကိုင် ၂၇ မျိုး တွင် ပါဝင်သည်။ နိုင်ငံခြားသားများကို ဤလုပ်ငန်းများတွင် အလုပ်လုပ်ကိုင်ခွင့်ပါမစ် လျှောက်ထားခြင်းကို တားမြစ်ထားသည်။
ဧည့်လမ်းညွှန်အဖြစ် လုပ်ကိုင်နေသူ သို့မဟုတ် ဆက်စပ်တာဝန်များကို ထမ်းဆောင်နေသူများသည် ဘတ်ငွေ ၅,၀၀၀ မှ ၅၀,၀၀၀ အထိ ဒဏ်ရိုက်ခြင်း၊ ပြည်နှင်ဒဏ် နှင့် အလုပ်လုပ်ကိုင်ခွင့်ပါမစ်အသစ် ရယူခြင်းမှ ၂ နှစ် ပိတ်ပင်ခြင်း တို့နှင့် ရင်ဆိုင်ရမည်။
နိုင်ငံခြားသားများကို တရားမဝင် ငှားရမ်းခြင်း သို့မဟုတ် ၎င်းတို့၏ ပါမစ်နယ်ပယ်ပြင်ပတွင် အလုပ်လုပ်ကိုင်ခွင့်ပြုသည့် အလုပ်ရှင်များသည် တရားမဝင် အလုပ်သမားတစ်ဦးလျှင် ဘတ်ငွေ ၁၀,၀၀၀ မှ ၁၀၀,၀၀၀ အထိ ဒဏ်ရိုက်ခြင်း ခံရမည်။
အထပ်ထပ်ကျူးလွန်ပါက ထောင်ဒဏ်တစ်နှစ်အထိ၊ အလုပ်သမားတစ်ဦးလျှင် ဘတ်ငွေ ၅၀,၀၀၀ မှ ၂၀၀,၀၀၀ အထိ ဒဏ်ရိုက်ခြင်း နှင့် နိုင်ငံခြားသား ဝန်ထမ်းငှားရမ်းခွင့် ၃ နှစ် ပိတ်ပင်ခြင်း တို့ဖြင့် အရေးယူခံရမည်ဖြစ်သည်။
ဝန်ကြီး Treenuch က အစိုးရအနေဖြင့် ခရီးသွားလုပ်ငန်းကို နိုင်ငံတော်ဝင်ငွေ၏ အဓိကရင်းမြစ်အဖြစ် မြှင့်တင်လိုကြောင်းနှင့် တစ်ချိန်တည်းမှာပင် ထိုင်းနိုင်ငံသားများ၏ အလုပ်အကိုင်အခွင့်အရေးကို ကာကွယ်လိုကြောင်း အလေးပေး ပြောကြားခဲ့သည်။ နိုင်ငံခြားသား ဧည့်လမ်းညွှန်များကို ငှားရမ်းခြင်းသည် ဥပဒေကို ချိုးဖောက်ခြင်းဖြစ်ပြီး အရည်အချင်းပြည့်မီသော ထိုင်းပညာရှင်များထံမှ အလုပ်အကိုင်အခွင့်အလမ်းများကို လုယူခြင်းဖြစ်သည်ဟု ၎င်းက ဆိုသည်။
Source: Ministry of Labour Thailand (MOL)
