တနင်္ဂနွေနေ့ ညပိုင်းက ဘန်ကောက်မြို့တွင် မိုးသည်းထန်စွာ ရွာသွန်းခဲ့ပြီး မြို့အနှံ့ ရေကြီးရေလျှံမှုများ ဖြစ်ပေါ်ခဲ့ပြီးနောက် ဒွန်မောင်းခရိုင်ရှိ အဓိကလမ်းမကြီးတစ်ခုသည် အနီးရှိတူးမြောင်းထဲသို့ ရေထုတ်ရန် အာဏာပိုင်များ ကြိုးပမ်းနေသဖြင့် တနင်္လာနေ့ နေ့လယ်ပိုင်းအထိ ရေနစ်မြုပ်နေဆဲ ဖြစ်ကြောင်း သိရသည်။
တနင်္လာနေ့ နေ့လယ်ပိုင်းအထိ ဆောင်ပရာဖာလမ်း (Song Prapha Road) ၏ အပိုင်းအချို့တွင် ရေများဖုံးလွှမ်းနေဆဲဖြစ်ပြီး အချို့နေရာများတွင် ရေအနက်သည် ပလက်ဖောင်းအမြင့်အထိ ရောက်ရှိခဲ့သည်။ယာဉ်မောင်းများသည် အနီးရှိ အိမ်များကို ပျက်စီးစေနိုင်သည့် လှိုင်းများ မဖြစ်ပေါ်စေရန်အတွက် လမ်းပေါ်၌ အလွန်နှေးကွေးစွာ မောင်းနှင်နေကြရသည်။
ဘန်ကောက် မက်ထရိုပိုလီတန် အုပ်ချုပ်ရေးအဖွဲ့ (BMA) မှ အရာရှိများက အခြားမြို့နယ်များတွင် ရေများ ပြန်လည်ကျဆင်းသွားသော်လည်း ဆောင်ပရာဖာလမ်းတွင် ရေကြီးနေရခြင်းမှာ ၎င်းနေရာမှ ရေများကို ခလောင်းဖရမ်ပရာချာကွန် (Khlong Prem Prachakorn) တူးမြောင်း ထဲသို့ မထုတ်နိုင်သောကြောင့်ဖြစ်သည်ဟု ရှင်းပြသည်။ အကြောင်းမှာ ထိုတူးမြောင်းတွင် ရေများ လျှံတက်နေဆဲ ဖြစ်သောကြောင့် ဖြစ်သည်။
အာဏာပိုင်များက မိုးရေချိန်သည် ၆၀ မီလီမီတာ ကျော်လွန်ပါက မြို့တော်၏ ရေနုတ်မြောင်းစနစ်သည် ရေများကို လုံလောက်သော အမြန်နှုန်းဖြင့် မထုတ်နိုင်သဖြင့် မိုးရေကျဆင်းသွားသည်အထိ ယာယီရေကြီးမှုများ ဖြစ်ပေါ်တတ်ကြောင်း ပြောကြားခဲ့သည်။ တနင်္ဂနွေနေ့ညတွင် ၁၃၁.၅ မီလီမီတာ ဖြင့် အမြင့်ဆုံး မိုးရေချိန်ရှိခဲ့သော လတ်ဆီခရိုင် အပါအဝင် မြို့တော်တစ်ဝန်းရှိ နေရာများစွာတွင် ရေကြီးမှုများ ဖြစ်ပွားခဲ့သည်။
Source: Nation Thailand
