ဖိလစ်ပိုင်နိုင်ငံတောင်ပိုင်း၊ မင်ဒါနာအိုကျွန်းရှိ မြို့တစ်မြို့တွင် Grand Theft Auto V (GTA V) ဂိမ်းထဲမှ အခန်းတစ်ခုကဲ့သို့ပင် ရဲတင်းလွန်းလှသည့် လုပ်ကြံသတ်ဖြတ်ရန် ကြိုးပမ်းမှုတစ်ခု နေ့ခင်းကြောင်တောင် လူစည်ကားရာနေရာ၌ ဖြစ်ပွားခဲ့သည်။
လက်နက်ကိုင်ဆောင်ထားသူများသည် လက်ရှိတာဝန်ထမ်းဆောင်နေသော မြို့တော်ဝန်၏ ယာဉ်တန်းကို လူစည်ကားရာ အများပြည်သူဆိုင်ရာနေရာတွင် RPG (Rocket-Propelled Grenade) ဖြင့် ပစ်ခတ်တိုက်ခိုက်ခဲ့သည်။
ပေါက်ကွဲမှုကြောင့် မြို့တော်ဝန်စီးနင်းလာသည့် ကားမှာ အကြီးအကျယ် ပျက်စီးသွားပြီး အပိုင်းအစများ လမ်းပေါ်သို့ လွင့်စင်ထွက်သွားခဲ့သဖြင့် အနီးနားရှိ ပြည်သူများအကြား ထိတ်လန့်တုန်လှုပ်မှုများ ဖြစ်ပေါ်ခဲ့သည်။တိုက်ခိုက်မှုမှာ ပြင်းထန်သော်လည်း ကံကောင်းထောက်မစွာဖြင့် မြို့တော်ဝန်မှာ အသက်ရှင်လွတ်မြောက်ခဲ့ပြီး အသက်အန္တရာယ်စိုးရိမ်ရသည့် ဒဏ်ရာမျိုး မရရှိခဲ့ဟု သိရသည်။
တိုက်ခိုက်သူများသည် အခင်းဖြစ်ပွားရာနေရာမှ ထွက်ပြေးသွားခဲ့သော်လည်း လုံခြုံရေးတပ်ဖွဲ့များက ချက်ချင်း လိုက်လံပိတ်ဆို့ ဖမ်းဆီးခဲ့သည်။လုံခြုံရေးတပ်ဖွဲ့များနှင့် တိုက်ခိုက်သူများအကြား လက်နက်ချင်း ပစ်ခတ်မှုဖြစ်ပွားခဲ့ပြီး တိုက်ခိုက်သူများအားလုံး သေဆုံးသွားခဲ့သည်။သေဆုံးသူများထံမှ တိုက်ခိုက်ရာတွင် အသုံးပြုခဲ့သည့် RPG အပါအဝင် အခြားသော သေနတ်များနှင့် ဖောက်ခွဲရေးပစ္စည်းများကို သိမ်းဆည်းရမိခဲ့သည်ဟု အာဏာပိုင်များက ထုတ်ပြန်ထားသည်။
Source: Bangkok Post
