အသက် ၄၀ အရွယ် ထိုင်းလေယာဉ်နည်းပြတစ်ဦးသည် တနင်္လာနေ့နံနက်ပိုင်းက ဖူးခက်တွင် လေယာဉ်ငယ်တစ်စီး ပျက်ကျမှုကြောင့် ရရှိခဲ့သော ဒဏ်ရာများဖြင့် သေဆုံးသွားခဲ့ပြီး ၎င်း၏ရုရှားကျောင်းသားမှာမူ အသက်ရှင်ကျန်ရစ်ခဲ့သည်။
ယင်းလေ့ကျင့်ရေးလေယာဉ်သည် တနင်္ဂနွေနေ့ မွန်းလွဲ ၄:၁၀ နာရီခန့်တွင် သလန်ခရိုင်ရှိ ပါခလောက်လေဆိပ်ငယ်အနီး၊ ပါခလောက်-အထိမ်းအမှတ်လမ်းမပေါ်သို့ ပျက်ကျခဲ့ခြင်း ဖြစ်သည်။ အရေးပေါ်ကယ်ဆယ်ရေးအဖွဲ့များက ဒဏ်ရာရရှိသူ နှစ်ဦးကို တွေ့ရှိခဲ့ပြီး ရှေးဦးသူနာပြုစုမှုများ ပြုလုပ်ပေးကာ သလန်ဆေးရုံသို့ ပို့ဆောင်ပေးခဲ့သည်။
“Flying Phuket Thung Kwai Bin” ဖေ့စ်ဘွတ်ခ်စာမျက်နှာမှ လေဆိပ်မန်နေဂျာနှင့် နည်းပြ ဆူရာဆက် ချန်နာသည် ဩဂုတ်လ (၁၈) ရက်နေ့ နံနက် (၅:၄၇) နာရီတွင် ကွယ်လွန်သွားကြောင်း ကြေညာခဲ့သည်။ ၎င်း၏မိသားစုနှင့် အဖွဲ့သည် လူမှုကွန်ရက်ပေါ်တွင် ဝမ်းနည်းကြောင်းပြောကြားခဲ့ကြသော လူများစွာထံမှ ရရှိခဲ့သည့် ချစ်ခြင်းမေတ္တာနှင့် ကူညီပံ့ပိုးမှုများအတွက် ကျေးဇူးတင်ကြောင်း ဖော်ပြခဲ့သည်။
ဆူရာဆက်နှင့်အတူ လေ့ကျင့်နေသည့် အသက် (၃၆) နှစ်အရွယ် ရုရှားနိုင်ငံသား ဆာဂီအမည်ရှိ ကျောင်းသားမှာမူ ယခုအခါ ကျန်းမာရေးတည်ငြိမ်နေပြီဖြစ်သည်။
ကနဦးစုံစမ်းစစ်ဆေးမှုအရ ယင်းလေယာဉ်သည် လေ့ကျင့်ရေးပျံသန်းမှုအတွက် ဩဂုတ်လ (၁၇) ရက်နေ့ မွန်းလွဲ (၂:၀၀) နာရီခန့်တွင် ထွက်ခွာခဲ့ခြင်းဖြစ်သည်။ လေယာဉ်ပျက်ကျရာနေရာအနီးရှိ ဒေသခံများက လေယာဉ်ပျက်ကျစဉ် လျှပ်စစ်ဓာတ်အားလိုင်းများကို တိုက်မိသကဲ့သို့ ကျယ်လောင်သောအသံတစ်ခုကို ကြားခဲ့ရကြောင်း ပြောကြားခဲ့သည်။
ဖူးခက်သတင်းအချက်အလက်ဌာန (Phuket Info Center) က ပျက်ကျခဲ့သောလေယာဉ်သည် Ultra Light Aircraft အမျိုးအစားဖြစ်ပြီး မှတ်ပုံတင်နံပါတ် UM-22 Quick Silver MXII Sprint ဖြစ်ကြောင်း ဖော်ပြခဲ့သည်။ ဤလေယာဉ်အမျိုးအစားသည် လေကြောင်းကျောင်းများအတွက် စံပြဖြစ်သည်ဟု ယူဆရပြီး ၎င်း၏ single-surface wing ဒီဇိုင်းကြောင့် အလွန်တိုတောင်းသော အကွာအဝေးမှပင် ပျံတက်နိုင်ခြင်းနှင့် အလွန်နိမ့်သော အမြန်နှုန်းများတွင်ပင် ခန့်မှန်းရလွယ်ကူစွာ ထိန်းချုပ်နိုင်ခြင်းကဲ့သို့သော ထူးခြားချက်များရှိသည်။ ဤအင်္ဂါရပ်များက MX II Sprint အမျိုးအစားလေယာဉ်ကို အလားတူလေယာဉ်များနှင့်နှိုင်းယှဉ်လျှင် လေ့လာသင်ယူရန် ပိုမိုလွယ်ကူစေသည်။
သလန်ရဲတပ်ဖွဲ့သည် အပျက်အစီးများကျန်နေသည့် လေယာဉ်ငယ်ကို စုံစမ်းစစ်ဆေးမှုများ ပြုလုပ်ရန်အတွက် နေရာကို ကာရံထားပြီး အတိအကျပျက်ကျရသည့်အကြောင်းရင်းကို ဆက်လက်စစ်ဆေးနေဆဲဖြစ်ကြောင်းသိရှိရပါသည်။
Source: Khaosod English
