ဖူးခက်၊ ကထူမြို့နယ်တွင် အမှိုက်ကားပေါ်မှ ပြုတ်ကျ၍ မြန်မာအလုပ်သမား သေဆုံး

ဖူးခက်ခရိုင်၊ ကထူမြို့နယ်တွင် အမှိုက်သယ်ဆောင်နေစဉ် လှုပ်ရှားနေသော အမှိုက်ကားပေါ်မှ ပြုတ်ကျခဲ့သော မြန်မာနိုင်ငံသား အလုပ်သမားတစ်ဦး သေဆုံးသွားခဲ့သည့် ဖြစ်ရပ်နှင့်ပတ်သက်၍ ရဲတပ်ဖွဲ့က စုံစမ်းစစ်ဆေးမှုများ ပြုလုပ်လျက်ရှိသည်။

ယမန်နေ့ အောက်တိုဘာ ၂၈ ရက်၊ နေ့လယ် ၂:၂၀ နာရီခန့် တွင် ဖရာဖူးခက်ကဲ လမ်းမပေါ်ရှိ ကသူ လူမှုဖူလုံရေးရုံးအနီး၌ ဖြစ်ပွားခဲ့သည်။ ရဲတပ်ဖွဲ့နှင့် အရေးပေါ်ကယ်ဆယ်ရေးအဖွဲ့များ ရောက်ရှိချိန်တွင် လမ်းဘေး၌ ခြောက်ဘီးတပ် ပုဂ္ဂလိက အမှိုက်ကား တစ်စီးကို တွေ့ရှိခဲ့ရသည်။

 အသက် ၂၈ နှစ်အရွယ် မြန်မာနိုင်ငံသား Wai Lin Kyaw (ဝေလင်းကျော်) သည် ရဲများမရောက်မီ ဆေးရုံသို့ အလျင်အမြန် ပို့ဆောင်ခဲ့ပြီး ဒဏ်ရာများကြောင့် နောက်ပိုင်းတွင် သေဆုံးသွားခဲ့ကြောင်း သိရသည်။

ကားမောင်းသူ အသက် ၂၃ နှစ်အရွယ် Anuthai Jindahtam (အနူထိုင်း ဂျင်ဒါထမ်) ၏ ပြောကြားချက်အရ ၎င်းနှင့် အလုပ်သမားနှစ်ဦးသည် အမှိုက်အိတ်များကို ပြန်လည် အသုံးပြုသည့် စင်တာသို့ သယ်ဆောင်နေခြင်း ဖြစ်သည်။ ဝေလင်းကျော်နှင့် အခြားအလုပ်သမားတစ်ဦးသည် ကားနောက်တွဲရှိ အမှိုက်အိတ်များပေါ်တွင် ထိုင်နေစဉ် အမှိုက်အိတ်တစ်လုံး ရွေ့လျားပြုတ်ကျသွားရာမှ ဝေလင်းကျော်မှာ ဟန်ချက်ပျက်ကာ လမ်းပေါ်သို့ ၃.၈ မီတာ (၁၂.၅ ပေ) ခန့် အမြင့်မှ ပြုတ်ကျခဲ့ခြင်း ဖြစ်သည်။

ကထူမြို့နယ် အရေးပေါ်ဝန်ထမ်းများနှင့် ကုဆိုလ်ဓမ္မ ဖူးခက် ဖောင်ဒေးရှင်းမှ စေတနာ့ဝန်ထမ်းများက အခင်းဖြစ်ပွားရာနေရာတွင် CPR (အရေးပေါ် အသက်ကယ် ကုသမှု) ကို ပြုလုပ်ပေးခဲ့သည်။ ဘန်ကောက် ဆီရိရို့ချ် ဆေးရုံမှ လူနာတင်ယာဉ်ဖြင့် ဝေလင်းကျော်အား ဆေးရုံသို့ ပို့ဆောင်ခဲ့သော်လည်း ဒဏ်ရာများဖြင့် နောက်ပိုင်းတွင် သေဆုံးသွားခဲ့သည်။

ရုပ်အလောင်းကို ဝချီရ ဖူးခက်ဆေးရုံ သို့ ရင်ခွဲစစ်ဆေးရန် ပို့ဆောင်ထားပြီး ရဲတပ်ဖွဲ့က ဖြစ်စဉ်ကို တရားဝင် မှတ်တမ်းတင်ကာ စုံစမ်းစစ်ဆေးမှုများ ဆက်လက်လုပ်ဆောင်နေသည်။ The Phuket News သတင်းအရ ရဲတပ်ဖွဲ့က လက်ရှိအချိန်အထိ သေဆုံးမှုနှင့် ပတ်သက်၍ မည်သည့် စွဲချက်မှ တင်သွင်းခြင်း မရှိသေး ဟု သိရသည်။ ရင်ခွဲစစ်ဆေးမှု ရလဒ်များနှင့် တရားဝင် ထွက်ဆိုချက်များ ပြီးဆုံးမှသာ အမှုအား ဆက်လက်သုံးသပ်မည်ဟု မျှော်လင့်ရသည်။

ရဲတပ်ဖွဲ့သည် အလုပ်သမားများနှင့် အလုပ်ရှင်များအားလုံးကို နောက်တွဲဖွင့်ထားသော ကားများပေါ်တွင် စီးနင်းခြင်း၏ အန္တရာယ်များ နှင့်ပတ်သက်၍ သတိပေးချက် ထုတ်ပြန်ခဲ့သည်။

Source: Thaiger