အရှေ့တောင်အာရှနှင့် သီရိလင်္ကာတွင် မုန်တိုင်းနှင့် ရေကြီးမှုများကြောင့် သေဆုံးသူ ၆၀၀ ကျော်၊ သန်းနှင့်ချီသော လူများ ရွှေ့ပြောင်းရ

ဒေသတွင်း၊ အာရှ — အာဆီယံနိုင်ငံသုံးနိုင်ငံဖြစ်သည့် အင်ဒိုနီးရှား၊ ထိုင်းနှင့် မလေးရှား အပြင်၊ သီရိလင်္ကာနိုင်ငံတို့တွင်ပါ ရက်ပေါင်းများစွာ ဆက်တိုက် ဖြစ်ပွားခဲ့သော မုန်တိုင်းနှင့် ရေကြီးမှုများကြောင့် သေဆုံးသူ စုစုပေါင်း ၆၀၀ ကျော် အထိ မြင့်တက်လာခဲ့ပြီး၊ လူပေါင်း ၄ သန်းကျော် ထိခိုက်နစ်နာကာ လူထောင်ပေါင်းများစွာ အစုလိုက်အပြုံလိုက် ရွှေ့ပြောင်းခဲ့ရသည်။

အင်ဒိုနီးရှား: သေဆုံးသူ ၄၃၅ ဦး ဖြင့် အများဆုံးဖြစ်ပြီး၊ အနောက်ပိုင်း ဆူမတြားကျွန်း တွင် မြေပြိုမှုများနှင့် ရေကြီးမှုများ အဆိုးရွားဆုံး ဖြစ်ပွားခဲ့သည်။ လမ်းများ ပိတ်ဆို့နေခြင်း၊ ဆက်သွယ်ရေး ကွန်ရက်များ ပျက်စီးနေခြင်းကြောင့် ကယ်ဆယ်ရေးအဖွဲ့များသည် ရဟတ်ယာဉ်များကို အသုံးပြု၍ ကူညီထောက်ပံ့ရေးပစ္စည်းများ ပို့ဆောင်ပေးနေရသည်။ ပိတ်မိနေသူ ၄၀၆ ဦး ပျောက်ဆုံးနေဆဲဖြစ်ပြီး၊ ၂၁၃,၀၀၀ ကျော် ရွှေ့ပြောင်းခဲ့ရသည်။

ထိုင်း: သေဆုံးသူ ၁၇၀ ဦး ရှိခဲ့ပြီး၊ စောင်ခလာပြည်နယ်၊ ဟတ်ယိုင်ခရိုင်၌ အဆိုးရွားဆုံး ဖြစ်ပွားခဲ့သည်။ ဟတ်ယိုင်မြို့တွင် သောကြာနေ့က မိုးရေချိန် ၃၃၅ မီလီမီတာ (နှစ်ပေါင်း ၃၀၀ အတွင်း အများဆုံး) ရွာသွန်းခဲ့သည်။

သီရိလင်္ကာ: Cyclone Diva မုန်တိုင်းဝင်ရောက်မှုကြောင့် ၃၃၀ ကျော် သေဆုံးခဲ့ပြီး၊ ၂၀၀ ကျော် ပျောက်ဆုံးနေဆဲဖြစ်သည်။ နိုင်ငံ၏ သုံးပုံတစ်ပုံခန့်သည် လျှပ်စစ်မီးနှင့် ရေသန့်ရရှိမှု ပြတ်တောက်နေရသည်။ အစိုးရက အရေးပေါ်အခြေအနေ ကြေညာထားပြီး ပြန်လည်ထူထောင်ရေး ကုန်ကျစရိတ် မြင့်မားမည်ဟု သတိပေးထားသည်။

ထိုင်းတောင်ပိုင်းတွင် လူပေါင်း ၃ သန်းနီးပါးနှင့် အင်ဒိုနီးရှား အနောက်ပိုင်းတွင် ၁.၁ သန်းခန့် အပါအဝင် စုစုပေါင်း ၄ သန်းကျော် ထိခိုက်ခဲ့သည်။

မလေးရှားတွင် သေဆုံးသူ ၃ ဦး အတည်ပြုခဲ့ပြီး၊ ကယ်ဆယ်ရေးစခန်းများတွင် လူပေါင်း ၁၈,၇၀၀ ခန့် ခိုလှုံနေရသည်။ မလေးရှားနိုင်ငံက ထိုင်းနိုင်ငံတွင် ပိတ်မိနေသော နိုင်ငံသား ၆,၂၀၀ ကျော်ကို ပြန်လည်ခေါ်ဆောင်နိုင်ခဲ့ပြီး၊ အင်ဒိုနီးရှားတွင် မြေပြိုမှုကြောင့် ပျောက်ဆုံးနေသော ၎င်းတို့နိုင်ငံသားအတွက် အကူအညီများ ဆောင်ရွက်ပေးလျက်ရှိသည်။

လေတပ်၊ စစ်တပ်နှင့် ရဲတပ်ဖွဲ့ဝင် ၂၄,၀၀၀ ကျော်ကို ကယ်ဆယ်ရေးအတွက် ချထားပြီး၊ ပျက်စီးသွားသော Mavil Aru ဆည်မှ ရေလွှမ်းမိုးခံရသူများကို ကယ်ဆယ်လျက်ရှိသည်။

Source: Nation Thailand