ကွာလာလမ်ပူ၊ မလေးရှား — ယနေ့ (ဒီဇင်ဘာ ၂၂ ရက်၊ ၂၀၂၅) မလေးရှားနိုင်ငံတွင် ကျင်းပခဲ့သည့် ထိုင်း-ကမ္ဘောဒီးယား ပဋိပက္ခဆိုင်ရာ အာဆီယံအထူးနိုင်ငံခြားရေးဝန်ကြီးများ အစည်းအဝေးသည် အပစ်အခတ်ရပ်စဲရေးအတွက် အပြီးသတ်သဘောတူညီမှု မရရှိဘဲ ပြီးဆုံးခဲ့ကြောင်း ထိုင်းနိုင်ငံခြားရေးဝန်ကြီး Sihasak Phuangketkeow က သတင်းစာရှင်းလင်းပွဲတွင် ပြောကြားခဲ့သည်။
၂ နာရီကြာ ဆွေးနွေးခဲ့သော်လည်း အောက်ပါအချက်များကြောင့် အပစ်ရပ်စဲရေးမှာ လက်တွေ့မကျသေးကြောင်း ထိုင်းဘက်က ထောက်ပြခဲ့သည်အပစ်ရပ်စဲရေးအတွက် အခြေအနေ (၃) ချက်:
- (၁) ကျူးကျော်သူအဖြစ် ကမ္ဘောဒီးယားဘက်က ဦးစွာ အပစ်ရပ်စဲကြောင်း ကြေညာရမည်။
- (၂) အပစ်ရပ်စဲမှုသည် စကားလုံးသက်သက်မဟုတ်ဘဲ လက်တွေ့ကျပြီး စဉ်ဆက်မပြတ် ဖြစ်ရမည်။
- (၃) မြေမြှုပ်မိုင်းရှင်းလင်းရေး: ထိုင်းစစ်သားများ ထိခိုက်နေသည့် မြေမြှုပ်မိုင်းပြဿနာကို ရိုးသားစွာ ပူးပေါင်းဖြေရှင်းရမည်။
ပူးတွဲကြေညာချက် လက်မှတ်ရေးထိုးပြီးနောက်တွင်ပင် ထိုင်းစစ်သားတစ်ဦး ထပ်မံ၍ (၇ ဦးမြောက်) မြေမြှုပ်မိုင်းနင်းမိခဲ့ခြင်းသည် သဘောတူညီချက်ကို ချိုးဖောက်ခြင်းဖြစ်သည်ဟု ထိုင်းဘက်က မြင်သည်။ဆွေးနွေးမှုအတွင်း အသံဖိုင်ပေါက်ကြားခဲ့ခြင်းသည် အာဆီယံ၏ “ပြည်တွင်းရေးကို ကြားဝင်မစွက်ဖက်ရေး” မူဝါဒကို ချိုးဖောက်ရာရောက်ပြီး နှစ်နိုင်ငံအကြား ယုံကြည်မှုကို ပျက်ပြားစေသည်ဟု ဆိုသည်။
ထိုင်းနိုင်ငံက နှစ်ဦးတည်း တိုက်ရိုက်ဆွေးနွေးရန် ကြိုးပမ်းသော်လည်း ကမ္ဘောဒီးယားဘက်က ကုလသမဂ္ဂကဲ့သို့ နိုင်ငံတကာအဆင့်သို့ ဆွဲတင်ရန် ကြိုးပမ်းနေခြင်းကိုလည်း ထိုင်းဘက်က ဝေဖန်ခဲ့သည်။
အပစ်အခတ်ရပ်စဲရေးသည် တစ်ဖက်သတ်ကြေညာရုံဖြင့် မရဘဲ နှစ်ဖက်စစ်တပ်အချင်းချင်း လက်တွေ့ကျသော ယန္တရားများအပေါ် သဘောတူရန် လိုအပ်သည်။ ထို့ကြောင့် လာမည့် ဒီဇင်ဘာလ ၂၄ ရက်တွင် အထွေထွေနယ်စပ်ကော်မတီ (GBC) အစည်းအဝေးကို ကျင်းပရန် ကမ္ဘောဒီးယားဘက်က အဆိုပြုထားသည်။
ထိုင်းနိုင်ငံအနေဖြင့် အိမ်နီးချင်းကောင်း ပီသစွာဖြင့် ယခင်က ဒုက္ခသည်များကို လက်ခံခြင်းနှင့် စီးပွားရေး ပြန်လည်ထူထောင်ခြင်းများတွင် ကူညီခဲ့ဖူးကြောင်း၊ ယခုလည်း ငြိမ်းချမ်းစွာ အတူယှဉ်တွဲနေထိုင်ရေးကိုသာ ရှေးရှုကြောင်း ဝန်ကြီးက ပြန်လည်အောက်မေ့ ပြောကြားခဲ့သည်။
Source: Nation Thailand
