သြဂုတ်လ (၂၁) ရက်၊ နံနက် (၉:၅၈) နာရီတွင် မြန်မာနိုင်ငံတောင်ပိုင်းကမ်းရိုးတန်းအနီး၊ မြေအောက် ၁၀ ကီလိုမီတာ အနက်တွင် မြောက်လတ္တီကျု ၁၆.၁၄၅° နှင့် အရှေ့လောင်ဂျီကျု ၉၆.၆၈၆° တွင် ဗဟိုပြု၍ ငလျင်လှုပ်ခတ်ခဲ့ကြောင်း မှတ်တမ်းများအရ သိရပါသည်။
ငလျင်ဗဟိုချက်သည် ထိုင်းနိုင်ငံ တာ့ခ်ပြည်နယ်၊ မဲဆောက်ခရိုင်၏ အနောက်တောင်ဘက် (၂၁၁) ကီလိုမီတာခန့် အကွာတွင် တည်ရှိသည်။
ထိုင်းနိုင်ငံတွင် ထိခိုက်ပျက်စီးမှု သို့မဟုတ် အကျိုးသက်ရောက်မှု တစ်စုံတစ်ရာ မတွေ့ရသေးသော်လည်း ဘန်ကောက်မြို့ရှိ ဒေသခံအချို့က ငလျင်လှုပ်ခတ်မှုကို ခံစားခဲ့ရကြောင်း ပြောကြားခဲ့သည်။
အလုပ်သမားဝန်ကြီးဌာန တည်ရှိရာ ဒင်ဒိုင်းခရိုင်တွင် ဝန်ကြီးဌာန အဆောက်အအုံအတွင်းရှိ လူများ ဘေးလွတ်ရာသို့ အလုအယက် ထွက်ပြေးခဲ့ရသည်အထိ တုန်ခါမှု ပြင်းထန်ခဲ့ပါသည်။
ခလောင်း တိုအီ နူအာ၊ ဝပ်ထနာခရိုင်တွင် နံနက် (၉:၅၈) နာရီခန့်က (၁၀) စက္ကန့်ခန့် ကြာမြင့်သော အနည်းငယ် တုန်ခါမှုများ ရှိခဲ့သည်။ ရတ်ချာထေဝီခရိုင်ရှိ ဘန်သတ် သွန့်လမ်းတွင် ရုံးဝန်ထမ်းများက အဆောက်အအုံ ယိမ်းယိုင်ခဲ့သည်ကို ခံစားရကြောင်း ပြောပါသည်။
နွန်ထဘူရီပြည်နယ်၊ ဘန်ကရာစော၊ မြို့ခရိုင်ရှိ ခယ်ရိုင်ဒေသမှ အထပ်မြင့်အဆောက်အအုံ၏ ၉ လွှာတွင် နေထိုင်သူများက အဆောက်အအုံ ယိမ်းယိုင်ကာ ခေါင်းမူးခဲ့ရကြောင်း ပြောဆိုခဲ့သည်။ စီလုံ၊ ဘန်ရတ်ခရိုင်တွင်လည်း လူများက ခေါင်းမူးကာ အဆောက်အအုံနှင့် အိမ်သုံးပစ္စည်းများ ခေတ္တမျှ တုန်ခါခဲ့သည်ကို သတိထားမိခဲ့ကြောင်း ပြောပါသည်။
ဖယာထိုင်းခရိုင်၊ ဆမ်ဆန်နိုင်းရှိ အထပ်မြင့်အဆောက်အအုံ၏ ၁၁ လွှာတွင် နေထိုင်သူများက တုန်ခါမှုနှင့် မျက်နှာကျက်မီးဆွဲများ ယိမ်းယိုင်ခဲ့သည်ကို တွေ့ရှိရကြောင်း ပြောကြားခဲ့သည်။ ခလောင်း တိုအီခရိုင်ရှိ ကွန်ဒိုမီနီယမ်၏ ၁၂ လွှာတွင် ရှိသူများက ရေပုံးများအတွင်းမှ ရေများ အနည်းငယ် လှိုင်းထခဲ့ကြောင်း ပြောပါသည်။
ခလောင်းဆန်ခရိုင်၊ ခလောင်းတန်ဆိုင်းရှိ ကွန်ဒိုမီနီယမ်၏ ၁၈ လွှာတွင် နေထိုင်သူများက ကရားသံများ ကြားရပြီး မီးဖိုချောင်မီးလုံးများ ယိမ်းယိုင်သည်ကို တွေ့ရှိခဲ့ရကြောင်း ပြောကြားခဲ့သည်။ ရတ်ချာထေဝီခရိုင်၊ ထွန့်ဖယာထိုင်းတွင် လူများက တုန်ခါမှု၊ ခေါင်းမူးခြင်းနှင့် ဆွဲထားသော မီးလုံးများ ရှေ့နောက် လှုပ်ယိမ်းခြင်းတို့ကို ခံစားခဲ့ရကြောင်း သိရပါသည်။
Source: The Nation Thailand
