တနင်္လာနေ့ နေမထွက်မီ အချိန်ခန့်တွင် Pathum Thani ခရိုင်၊ Muang မြို့နယ်ရှိ Ratchaphreuk လမ်းပေါ်၌ ၎င်းတို့စီးလာသောယာဉ်သည် လမ်းလယ်ကျွန်းကိုကျော်တက်ပြီး တိမ်းမှောက်သွားခဲ့ရာ မြန်မာနိုင်ငံသား ၂ ဦး သေဆုံးပြီး ၇ ဦး ဒဏ်ရာရရှိခဲ့သည်။
ယာဉ်တိုက်မှုသည် Pathum Thani-Rangsit တံတားအနီးရှိ အဝေးပြေးလမ်း ၃၄၆ တွင် ဖြစ်ပွားခဲ့ပြီး နံနက် ၅:၃၀ နာရီခန့်တွင် သတင်းပို့ခဲ့ကြောင်း Muang ရဲစခန်းမှ စုံစမ်းရေးမှူး Pol Lt Suthon Jitphum က ပြောသည်။ ယာဉ်သည် Ban Changရပ်ကွက်ရှိ Santisuk လမ်းဆုံဘက်သို့ ဦးတည်မောင်းနှင်နေခဲ့ကြောင်းလည်း သိရသည်။
အရေးပေါ်ကယ်ဆယ်ရေးအဖွဲ့များက ဘန်ကောက်လိုင်စင်နံပါတ်ပါသော Toyota Innova ယာဉ်တစ်စီးသည် လမ်းလယ်ရှိ ကွန်ကရစ်တိုင်နှစ်တန်းကြားတွင် ဘေးတိုက်ပိတ်မိနေပြီး သံမဏိဆိုင်းဘုတ်တိုင်ကို ဝင်တိုက်ထားသည်ကို တွေ့ရှိခဲ့ကြောင်း သတင်းပေးပို့ခဲ့သည်။
ယာဉ်မှာ ဆိုးရွားစွာ ပျက်စီးခဲ့ပြီး ခရီးသည် ၉ ဦး၊ အမျိုးသား ၇ ဦးနှင့် အမျိုးသမီး ၂ ဦးတို့မှာ ဒဏ်ရာရရှိကာ ယာဉ်ပျက်အပျက်အစီးများကြားတွင် ပိတ်မိနေသည်ကို တွေ့ရှိခဲ့ရသည်။ ၎င်းတို့သည် အကူအညီတောင်းခံနေကြပြီး ၎င်းတို့အနက် ယာဉ်မောင်းထိုင်ခုံရှိ အမျိုးသားနှင့် ရှေ့ခရီးသည်ထိုင်ခုံရှိ အမျိုးသမီးတို့မှာ ပြင်းထန်စွာ ဒဏ်ရာရရှိခဲ့သည်။
ကယ်ဆယ်ရေးလုပ်သားများသည် ၎င်းတို့အား (ယာဉ်အတွင်းမှ) ကယ်ထုတ်ရန်အတွက် hydraulic cutters များကို အသုံးပြုခဲ့သည်။ အထူးပြင်းထန်ဒဏ်ရာရရှိခဲ့သော နှစ်ဦးကို အခင်းဖြစ်ပွားရာနေရာတွင် သေဆုံးကြောင်း ကြေညာခဲ့ပြီး ကျန်ခုနစ်ဦးကို Pathum Thani နှင့် Lat Lum Kaeo ဆေးရုံများသို့ အလျင်အမြန်ပို့ဆောင်ခဲ့သည်။
Poh Teck Tung Foundation မှ ကယ်ဆယ်ရေးလုပ်သား Orachun Otsatheet က သေဆုံးသူများသည် ယာဉ်မောင်းနှင့် အမျိုးသမီးခရီးသည်တို့ဖြစ်ကြောင်း အတည်ပြုခဲ့သည်။
စုံစမ်းစစ်ဆေးသူများက ယာဉ်မောင်းသည် အိပ်ပျော်သွားခြင်းဖြစ်နိုင်ကြောင်း ပြောသည်။ ထိခိုက်ခံရသူအားလုံးသည် မြန်မာနိုင်ငံသားများဖြစ်သည်။ အခင်းဖြစ်ပွားရာနေရာတွင် မည်သူမျှ ရဲအရာရှိများနှင့် ဆက်သွယ်ပြောဆိုနိုင်ခြင်းမရှိခဲ့ပေ။
ရဲတပ်ဖွဲ့က ထိုအဖွဲ့သည် Pathum Thani ရှိ အကြီးစားလက်ကားဈေးဖြစ်သော Talad Thai သို့ သွားနေကြသည်ဟု ယုံကြည်သည်။ လူဝင်မှုကြီးကြပ်ရေးရဲတပ်ဖွဲ့အား ၎င်းတို့ တရားမဝင်ဝင်ရောက်ခဲ့ခြင်းဟုတ်မဟုတ်၊ တရားမဝင်ဝင်ရောက်ခဲ့ပါက ၎င်းတို့အား တရားမဝင်ခိုးသွင်းခြင်းတွင် ထိုင်းနိုင်ငံသားများ ပါဝင်ခဲ့ခြင်းရှိမရှိ စုံစမ်းရန် တောင်းဆိုထားသည်။
Source: Bangkok Post
