တရုတ်နိုင်ငံခြားရေးဝန်ကြီးဌာနက သမ္မတ Xi Jinping (ရှီကျင့်ဖျင်) သည် အမေရိကန်သမ္မတ Donald Trump (ဒေါ်နယ်လ် ထရမ့်) နှင့် ကြာသပတေးနေ့ တွင် တောင်ကိုရီးယားနိုင်ငံ ၌ တွေ့ဆုံမည်ဖြစ်ကြောင်း အတည်ပြုခဲ့သည်။ ဤမျှော်မှန်းထားသည့် တွေ့ဆုံမှုသည် လများစွာကြာ ဖြစ်ပွားခဲ့သော ကုန်သွယ်ရေး တင်းမာမှုများကို လျှော့ချပေးနိုင်ရန် နှစ်ဖက်စလုံးမှ ကုန်သည်များနှင့် ရင်းနှီးမြှုပ်နှံသူများက မျှော်လင့်နေကြသည်။
နိုင်ငံခြားရေးဝန်ကြီးဌာန ပြောရေးဆိုခွင့်ရှိသူ Guo Jiakun (ကောကျီကွန်း) က ဗုဒ္ဓဟူးနေ့တွင် “နှစ်နိုင်ငံ ခေါင်းဆောင်များသည် မဟာဗျူဟာမြောက်နှင့် ရေရှည်ကိစ္စရပ်များ နှင့်ပတ်သက်၍ နက်နက်နဲနဲ ဆွေးနွေးပြောဆိုကြမည်” ဟု ပြောကြားခဲ့သည်။ ၎င်းက ကမ္ဘာ့အကြီးဆုံး စီးပွားရေးနိုင်ငံ နှစ်နိုင်ငံ၏ ခေါင်းဆောင်များ ဘူဆန် ဆိပ်ကမ်းမြို့၌ သဘောတူညီရန် မျှော်မှန်းထားသည့် ကုန်သွယ်ရေး သဘောတူညီချက်ကို တိုက်ရိုက် ရည်ညွှန်းခြင်းမရှိသော်လည်း၊ “ဤတွေ့ဆုံမှု၏ အပြုသဘောဆောင်သော ရလဒ်များကို မြှင့်တင်ရန်နှင့် တရုတ်-အမေရိကန် ဆက်ဆံရေး တည်ငြိမ်စွာ ဖွံ့ဖြိုးတိုးတက်စေရန်အတွက် လမ်းညွှန်မှုနှင့် တွန်းအားအသစ်များ ပေးစွမ်းနိုင်ရန် အမေရိကန်နှင့် ပူးပေါင်းဆောင်ရွက်လိုပါသည်” ဟု ၎င်းက ထပ်လောင်းပြောကြားခဲ့သည်။
သမ္မတထရမ့်ကမူ တောင်ကိုရီးယားသို့ သွားရောက်စဉ် လေယာဉ်ပေါ်မှနေ၍ ၎င်းနှင့် ရှီကျင့်ဖျင်တို့သည် နှစ်နိုင်ငံအတွက် “ကောင်းမွန်သော သဘောတူညီချက်” တစ်ခုကို ရရှိမည်ဖြစ်ကြောင်း ဗုဒ္ဓဟူးနေ့ အစောပိုင်းတွင် ပြောကြားခဲ့သည်။
ထရမ့်နှင့် ရှီတို့ တွေ့ဆုံမည်ဟူသော မျှော်လင့်ချက်များသည် ကမ္ဘာလုံးဆိုင်ရာ ထောက်ပံ့ရေးကွင်းဆက်များကို ထိခိုက်စေခဲ့သော အခွန်အတုပ်စစ်ပွဲကို ဖြေရှင်းရန် ရည်ရွယ်သည့် ဆွေးနွေးပွဲများမှ ခေါင်းဆောင်နှစ်ဦး ထွက်ခွာသွားနိုင်သည့် စိုးရိမ်မှုများကို လျှော့ချပေးခဲ့ပြီး ပြီးခဲ့သည့် တစ်လအတွင်း စျေးကွက်များကို တည်ငြိမ်စေခဲ့သည်။
ဝါရှင်တန်နှင့် ပေကျင်းတို့သည် ဖန်တန်နေးလ် စီးဆင်းမှု၊ နည်းပညာမြင့် ချစ်ပ်များ၊ ရှားပါးမြေဓာတ် ထိန်းချုပ်မှုနှင့် ပဲပုပ်များ အပါအဝင် အခြားသော ကိစ္စရပ်များတွင်လည်း သဘောထားကွဲလွဲနေဆဲ ဖြစ်သည်။
သမ္မတ ရှီကျင့်ဖျင်သည် ကြာသပတေးနေ့မှ စနေနေ့အထိ အာရှ-ပစိဖိတ် စီးပွားရေး ပူးပေါင်းဆောင်ရွက်မှု အစည်းအဝေး နှင့် နိုင်ငံတော် ခရီးစဉ်အတွက် တောင်ကိုရီးယား၌ ရှိနေမည်ဖြစ်သည်။ သမ္မတ ထရမ့်ကမူ ထိုဒေသဆိုင်ရာ ထိပ်သီးအစည်းအဝေးကို တက်ရောက်မည် မဟုတ်ပေ။
Source: Reuters
