ပြည်သူ့ပါတီ (PP) ခေါင်းဆောင် နတ်ထဖုန် ရုန်(ng)ပန်ယာဝက် (Natthaphong Ruengpanyawut) က ဘုံဂျိုင်းထိုင်းပါတီ (Bhumjaithai) ခေါင်းဆောင် အနုတင် ချာနဗီရာကူလ် (Anutin Charnvirakul) ကို ဝန်ကြီးချုပ်သစ်အဖြစ် ထောက်ခံကြောင်း ဗုဒ္ဓဟူးနေ့နံနက်ပိုင်းတွင် ကြေညာခဲ့သည်။ သို့သော် အာဏာရ ဖူးထိုင်းပါတီ (Pheu Thai) မှ အိမ်စောင့်ဝန်ကြီးချုပ်ကမူ လွှတ်တော်ဖျက်သိမ်းရေးအတွက် ရွှေ့ခဲ့သည်။
PP ပါတီ၏ ထောက်ခံမှုနှင့် အခြေအနေများ
- နတ်ထဖုန်းက PP ပါတီသည် အမတ်နေရာ (၁၄၃) နေရာဖြင့် ဘုံဂျိုင်းထိုင်းဦးဆောင်သော အစိုးရသစ်ကို ဦးဆောင်နိုင်စွမ်းရှိသည်ဟု ပြောသည်။
- PP ပါတီသည် ၂၀၂၃ ရွေးကောက်ပွဲတွင် အနိုင်ရသော်လည်း အစိုးရဖွဲ့စည်းရာတွင် ဖူးထိုင်းပါတီ၏ လှည့်စားမှုကို ခံခဲ့ရပြီး နောက်ဆုံးတွင် အတိုက်အခံအဖြစ် ဦးဆောင်ခဲ့ရသည်။
- PP ၏ ထောက်ခံမှုအတွက် အပြန်အလှန်အားဖြင့် ဝန်ကြီးချုပ်သစ်သည် အစိုးရသစ်၏ မူဝါဒအစီအစဉ်ကို လွှတ်တော်တွင် ကြေညာပြီး လေးလအတွင်း အောက်လွှတ်တော်ကို ဖျက်သိမ်းပေးရမည်ဟု PP က တောင်းဆိုခဲ့သည်။
- အကယ်၍ ဖွဲ့စည်းပုံအခြေခံဥပဒေအသစ်အတွက် ပြည်သူ့ဆန္ဒခံယူပွဲ ပြုလုပ်ရန် လိုအပ်ပါက ယင်းကို အထွေထွေရွေးကောက်ပွဲထက် နောက်မကျစေဘဲ ကျင်းပရမည်။
- အကယ်၍ ဆန္ဒခံယူပွဲ မလိုအပ်ပါက အစိုးရအဖွဲ့သစ်၊ PP နှင့် ဘုံဂျိုင်းထိုင်းတို့သည် လက်ရှိလွှတ်တော်သက်တမ်းအတွင်း ရွေးကောက်ခံ ဖွဲ့စည်းပုံအခြေခံဥပဒေရေးဆွဲရေးအဖွဲ့တစ်ခု ရရှိရန် လက်ရှိ ဖွဲ့စည်းပုံအခြေခံဥပဒေကို အမြန်ဆုံးပြင်ဆင်မည်။
- PP ပါတီသည် အတိုက်အခံအဖြစ်သာ ဆက်လက်တည်ရှိမည်ဖြစ်ပြီး အစိုးရအဖွဲ့သစ်တွင် ပါဝင်မည်မဟုတ်ပေ။
ဖူးထိုင်းပါတီ၏ တုံ့ပြန်မှု
- ဖူးထိုင်းပါတီ၏ အတွင်းရေးမှူးချုပ် စောရာဝေါင်း ထိုင်းအမ်ထုံ (Sorawong Thienthong) က ဖူးထိုင်းအိမ်စောင့်ဝန်ကြီးချုပ် ဖူမ်ထမ် ဝေချာယချိုင်း (Phumtham Wechayachai) သည် အင်္ဂါနေ့ညက လွှတ်တော်ဖျက်သိမ်းရေးအတွက် ဘုရင့်ခွင့်ပြုချက် ရယူခဲ့ကြောင်း ပြောကြားခဲ့သည်။
- စောရာဝေါင်းက ဘုံဂျိုင်းထိုင်းပါတီသည် မဲ (၁၃၀) ခန့်ဖြင့် မတည်ငြိမ်သော အစိုးရကိုသာ ဦးဆောင်နိုင်မည်ဖြစ်သောကြောင့် လွှတ်တော်ကို ချက်ချင်းဖျက်သိမ်းသင့်သည်ဟု ဆိုသည်။
- ဖူမ်ထမ်ကလည်း နိုင်ငံရေးအခြေအနေ ရှုပ်ထွေးလာ၍ အင်္ဂါနေ့ညတွင် လွှတ်တော်ဖျက်သိမ်းရေး ရွှေ့ခဲ့ကြောင်း ပြောကြားခဲ့သည်။ PP ၏ ထောက်ခံမှုသည် အစိုးရနှင့် အတိုက်အခံနှစ်မျိုးစလုံး၏ အခန်းကဏ္ဍကို ရယူထားသကဲ့သို့ ဖြစ်နေသည်ဟု သူကဆိုသည်။
- သြဂုတ်လ ၂၉ ရက်နေ့တွင် ဖွဲ့စည်းပုံအခြေခံဥပဒေဆိုင်ရာတရားရုံးက ဝန်ကြီးချုပ် ပေတောင်တာန် ရှင်နာဝါထရာ (Paetongtarn Shinawatra) ကို ကျင့်ဝတ်စည်းကမ်းဖောက်ဖျက်မှုဖြင့် ရာထူးမှ ဆိုင်းငံ့ဖယ်ရှားခဲ့သည်။ ဤဆုံးဖြတ်ချက်ကြောင့် လွှတ်တော်မှ ဝန်ကြီးချုပ်သစ်ကို ရွေးကောက်တင်မြှောက်ရန် လမ်းပွင့်လာခဲ့သည်ဟု သိရှိရပါသည်။
Source: Bangkok Post
