ကမ္ဘောဒီးယားဝန်ကြီးချုပ် ဟွန်မာနက်သည် ထိုင်းနိုင်ငံ၏ အသစ်ခန့်အပ်ခံရသော ခေါင်းဆောင် အနူတင် ချန်းဗီရာကူလ် (Anutin Charnvirakul) ကို ဂုဏ်ပြုလွှာပေးပို့ခဲ့ပြီး နှစ်နိုင်ငံကြား ကြာရှည်ဖြစ်ပွားနေသော နယ်စပ်တင်းမာမှုများကို ဖြေရှင်းရန်အတွက် သူနှင့်အတူ အနီးကပ်ပူးပေါင်းဆောင်ရွက်သွားမည်ဟု ကတိပြုပြောကြားခဲ့သည်။
Khmer Times သတင်းစာ၏ ဖော်ပြချက်အရ ဟွန်မာနက်သည် ဘန်ကောက်မြို့သို့ တရားဝင်ပေးပို့သော သဝဏ်လွှာတွင် အနူတင်၏ အောင်မြင်မှုကို “ခင်ဗျားရဲ့ ခေါင်းဆောင်မှုအပေါ် ခိုင်မာတဲ့ ယုံကြည်မှုရဲ့ ရောင်ပြန်ဟပ်မှုတစ်ခုပါပဲ” ဟု ချီးကျူးဂုဏ်ပြုခဲ့သည်။
အနူတင်၏ ဦးဆောင်မှုအောက်တွင် ထိုင်းနိုင်ငံသည် “ပိုမိုကြီးမားသော တိုးတက်မှုများ ရရှိလိမ့်မည်” ဟု ယုံကြည်ကြောင်းလည်း ၎င်းက ထပ်လောင်းပြောကြားခဲ့သည်။
ကမ္ဘောဒီးယားနှင့် ထိုင်းနိုင်ငံတို့ကြား နီးစပ်သော ပထဝီဝင်၊ သမိုင်းနှင့် ယဉ်ကျေးမှုဆိုင်ရာ ဆက်နွှယ်မှုများကို မီးမောင်းထိုးပြရင်း ဝန်ကြီးချုပ် ဟွန်မာနက်က နှစ်နိုင်ငံပြည်သူများအတွက် “ငြိမ်းချမ်းရေး၊ သဟဇာတဖြစ်တည်မှုနှင့် ဘုံကြွယ်ဝချမ်းသာမှု” တို့၏ အရေးပါပုံကို အလေးပေးပြောကြားခဲ့သည်။
၎င်းသည် မကြာသေးမီနှစ်များအတွင်း တင်းမာမှုများရင်ဆိုင်ခဲ့ရသော ဆက်ဆံရေးကို ပိုမိုကောင်းမွန်လာစေရန်အတွက် နှစ်နိုင်ငံအစိုးရများ အတူတကွ ပူးပေါင်းဆောင်ရွက်နိုင်လိမ့်မည်ဟု မျှော်လင့်ကြောင်းလည်း ထုတ်ဖော်ပြောဆိုခဲ့သည်။
ဟွန်မာနက်သည် နှစ်နိုင်ငံဆက်ဆံရေး ပြန်လည်တည်ဆောက်ရန်၊ အပြန်အလှန်ယုံကြည်မှု ပြန်လည်ထူထောင်ရန်နှင့် နှစ်နိုင်ငံနယ်စပ်ကို “ငြိမ်းချမ်းရေး၊ ပူးပေါင်းဆောင်ရွက်မှု၊ ဖွံ့ဖြိုးတိုးတက်မှုနှင့် ဘုံကြွယ်ဝချမ်းသာမှု” ရှိသော နေရာတစ်ခုအဖြစ် ပြောင်းလဲရန်အတွက် အနူတင်နှင့်အတူ ပူးပေါင်းလုပ်ဆောင်သွားမည်ဟု ထပ်လောင်းကတိပြုခဲ့သည်။
ကမ္ဘောဒီးယားခေါင်းဆောင်၏ သဝဏ်လွှာကို အနူတင်က ၎င်း၏အစိုးရအနေဖြင့် ထိုင်းနိုင်ငံကို ရှေ့ဆက်ဦးဆောင်မည့် လေးချက်ပါ မူဝါဒလမ်းပြမြေပုံကို ချပြချိန်နှင့် တစ်ပြိုင်နက်တည်း ပေးပို့ခဲ့ခြင်းဖြစ်သည်။ ဝန်ကြီးချုပ်အဖြစ် ပထမဆုံးအကြိမ်ပြုလုပ်သော သတင်းစာရှင်းလင်းပွဲတွင် အနူတင်က ကမ္ဘောဒီးယားနှင့် နယ်နိမိတ်အငြင်းပွားမှုကို ဖြေရှင်းရန်မှာ အဓိကဦးစားပေးဖြစ်ကြောင်း အတည်ပြုခဲ့သည်။
“ပြည်သူတွေအတွက် ဆုံးရှုံးမှုတွေ လျှော့ချနိုင်ဖို့ ငြိမ်းချမ်းတဲ့နည်းလမ်းနဲ့ ထိုင်းနဲ့ကမ္ဘောဒီးယားကြားက အငြင်းပွားမှုကို ဖြေရှင်းဖို့ အစိုးရက အစီအမံတွေ အကောင်အထည်ဖော်သွားပါမယ်” ဟု အနူတင်က ပြောကြားခဲ့သည်။
၎င်း၏အစိုးရသည် ထိုင်းပိုင်နက် “တစ်စင်တီမီတာမျှ” ကိုပင် လက်လွှတ်မည်မဟုတ်ကြောင်းနှင့် ထိုင်းပြည်သူများ နစ်နာမှုမရှိစေရကြောင်း အတည်ပြုပြောဆိုခဲ့သည်။
ထို့ပြင် ဖြစ်ပွားနေသော နယ်စပ်တင်းမာမှုများကြောင့် ထိခိုက်ခံစားရသည့် နိုင်ငံသားအားလုံးကို အမြန်ဆုံးနှင့် ပြည့်ပြည့်စုံစုံ လျော်ကြေးပေးသွားမည်ဟုလည်း ကတိပြုခဲ့ကြောင်းသိရှိရပါသည်။
Source: The Nation Thailand
