ထိုင်းခရီးသွားရဲတပ်ဖွဲ့သည် Koh Phangan ကျွန်းတွင် တရားမဝင်ခရီးသွားလမ်းညွှန်လုပ်ငန်းလုပ်ကိုင်သည့် ဂျာမန်အမျိုးသားတစ်ဦးနှင့် ၎င်း၏လက်အောက်ခံ တရားမဝင်လမ်းညွှန်အဖြစ် ငှားရမ်းထားသည်ဟု စွပ်စွဲခံရသည့် မြန်မာနိုင်ငံသားတစ်ဦးကို ဥပဒေအရ အရေးယူဆောင်ရွက်ခဲ့သည်။
ခရီးသွားရဲမှူး ဒုတိယရဲမှူးကြီး Winit Boonchit ဦးဆောင်သော Koh Phangan ခရီးသွားရဲတပ်ဖွဲ့မှ အရာရှိများသည် လိုင်စင်မဲ့လျှပ်စစ်ဆိုင်ကယ်များကို အသုံးပြု၍ တရားမဝင်ခရီးသွားလမ်းညွှန်အဖြစ် လုပ်ကိုင်နေပြီး အနှောင့်အယှက်များနှင့် လမ်းဘေးအန္တရာယ်များ ဖန်တီးနေသည့် နိုင်ငံခြားသားများနှင့်ပတ်သက်၍ ပြည်သူလူထု၏ တိုင်ကြားချက်များကို စုံစမ်းစစ်ဆေးခဲ့သည်။
စက်တင်ဘာ ၂၂ ရက်တွင် အာဏာပိုင်များသည် နိုင်ငံခြားသားခရီးသွားနှစ်ဦးကို လမ်းညွှန်နေစဉ် အသက် ၃၁ နှစ်အရွယ် မြန်မာနိုင်ငံသား Mr. Pyae ကို ဖမ်းဆီးခဲ့သည်။ ၎င်းကို လိုင်စင်မဲ့ခရီးသွားလမ်းညွှန်အဖြစ် လုပ်ကိုင်ခြင်းနှင့် အလုပ်လုပ်ခွင့်ပါမစ်မရှိဘဲ လုပ်ကိုင်ခြင်းတို့ဖြင့် စွဲချက်တင်ခဲ့သည်။
ဖမ်းဆီးနေစဉ်အတွင်း အသက် ၃၃ နှစ်အရွယ် ဂျာမန်နိုင်ငံသား Mr. Roman သည် အခင်းဖြစ်ပွားရာသို့ ရောက်လာပြီး မိမိကိုယ်ကို Pyae ၏အလုပ်ရှင်ဖြစ်ကြောင်း မိတ်ဆက်ခဲ့သည်။ ၎င်းသည် မြန်မာအမျိုးသားကို ခရီးသွားလမ်းညွှန်အဖြစ် ငှားရမ်းခဲ့ပြီး နေ့စားလုပ်ခအပြင် အပိုဆုကြေးများပါ ပေးဆောင်ခဲ့ကြောင်း ဝန်ခံခဲ့သည်။ ၎င်းသည် “Dirt E-Bike Co., Ltd.” ဟုခေါ်သော ခရီးသွားကုမ္ပဏီကို ခြောက်လကြာ လုပ်ကိုင်ခဲ့ပြီး အွန်လိုင်းမှ ကြော်ငြာကာ လူတစ်ဦးလျှင် တစ်နာရီကို ဘတ် ၂,၀၀၀ ဖြင့် ဝန်ဆောင်မှုပေးခဲ့ကြောင်း ပြောကြားခဲ့သည်။
စာရွက်စာတမ်းစစ်ဆေးမှုများအရ ကုမ္ပဏီ၏ရုံးချုပ်သည် Koh Samui တွင်ရှိသော်လည်း Koh Phangan တွင် လုပ်ကိုင်ရန်အတွက် ရုံးခွဲလိုင်စင်ရယူထားခြင်းမရှိကြောင်း တွေ့ရှိရသည်။ Roman သည် ခွင့်ပြုထားသည့် လုပ်ငန်းနယ်ပယ်ပြင်ပတွင် လုပ်ကိုင်ခြင်းနှင့် သင့်လျော်သောခွင့်ပြုချက်မရှိဘဲ နိုင်ငံခြားသားကို အလုပ်ခန့်ထားခြင်းတို့အတွက် နောက်ထပ်စွဲချက်များ ရင်ဆိုင်နေရသည်။
ရဲတပ်ဖွဲ့က Dirt E-Bike Co., Ltd. ၏ ဒါရိုက်တာများကိုလည်း “ရုံးခွဲလိုင်စင်မရှိဘဲ ခရီးသွားလုပ်ငန်းလုပ်ကိုင်ခြင်း” အတွက် တိုင်ကြားမှုများ ပြုလုပ်ခဲ့သည်။ သံသယရှိသူနှစ်ဦးစလုံးကို Koh Phangan ရဲစခန်းသို့ တရားစွဲဆိုရန်အတွက် လွှဲပြောင်းပေးခဲ့သည်။ အာဏာပိုင်များသည် ဘတ်သန်းပေါင်းများစွာတန်ဖိုးရှိ လျှပ်စစ်ဆိုင်ကယ်များနှင့် ပစ္စည်းများကို သိမ်းဆည်းခဲ့သည်။
ရဲမှူး ဒုတိယရဲမှူးကြီး Winit က ခရီးသွားလမ်းညွှန်လုပ်ငန်းသည် ထိုင်းနိုင်ငံသားများအတွက်သာ သီးသန့်ဖြစ်ကြောင်း အလေးပေးပြောကြားခဲ့ပြီး ထိုင်းနှင့် နိုင်ငံခြားသားခရီးသွားလုပ်ငန်းလုပ်ကိုင်သူအားလုံးကို ဥပဒေနှင့်အညီ တင်းတင်းကျပ်ကျပ်လိုက်နာရန် တိုက်တွန်းခဲ့သည်။ ဥပဒေချိုးဖောက်သူများအား ပြတ်ပြတ်သားသား ဥပဒေအရအရေးယူသွားမည်ဟုလည်း သတိပေးခဲ့သည်။
ဤဖမ်းဆီးမှုသည် ထိုင်းနိုင်ငံ ခရီးသွားလမ်းညွှန်အသင်းက ဝန်ကြီးချုပ်သစ် Anutin Charnvirakul ထံသို့ စက်တင်ဘာ (၁၀) ရက်တွင် တောင်းဆိုခဲ့သည့် အချက်များအပြီးတွင် ဖြစ်ပေါ်လာခြင်းဖြစ်သည်။ ယင်းတောင်းဆိုမှုတွင် နိုင်ငံခြားသားများက ထိုင်းနိုင်ငံသားတို့၏ အလုပ်အကိုင်များကို ကျူးကျော်ဝင်ရောက်ခြင်းနှင့် ခရီးသွားလုပ်ငန်းများသို့ ဝင်ရောက်လာခြင်းတို့ကြောင့် ထိုင်းစီးပွားရေးလုပ်ငန်းများကို ထိခိုက်စေခြင်းအပါအဝင် အရေးပေါ်ကိစ္စလေးခုကို မီးမောင်းထိုးပြခဲ့သည်။ အဆိုပါလမ်းညွှန်အသင်းက သက်ဆိုင်ရာဥပဒေများကို တင်းတင်းကျပ်ကျပ် အကောင်အထည်ဖော်ရန် တောင်းဆိုခဲ့သည်ဟုသိရပါသည်။
Source: Khaosod
