ထိုင်းနိုင်ငံအရှေ့မြောက်ပိုင်း၊ စကွန်နခွန်ခရိုင် (Sakon Nakhon) ရှိ စာသင်ကျောင်းတစ်ခုတွင် လွန်ခဲ့သည့် ဇွန်လ ၁၂ ရက်က အသက် ၉ နှစ်အရွယ် ပထမတန်း (Prathom 3 / Year 4) ကျောင်းသားတစ်ဦးသည် ကျောင်းအုပ်ချုပ်ရေးပိုင်းမှ ဆရာမတစ်ဦးကို ဓားမအရှည်ကြီး (Machete) ကိုင်ဆောင်ကာ တစ်ကျောင်းလုံးအနှံ့ လိုက်လံခုတ်သတ်ရန် ကြိုးပမ်းခဲ့သည့် ထိတ်လန့်ဖွယ်ရာ ဖြစ်စဉ်တစ်ခု ဖြစ်ပွားခဲ့ပါတယ်။
လူမှုကွန်ရက်စာမျက်နှာများတွင် ပျံ့နှံ့လာသည့် ဗီဒီယိုဖိုင်အရ အဆိုပါ ၉ နှစ်အရွယ် ကျောင်းသားသည် အတန်းဖော်တစ်ဦးနှင့် စကားများရန်ဖြစ်နေသဖြင့် အတန်းပိုင်ဆရာမက ဝင်ရောက်တားဆီး သတိပေးခဲ့သည်။ ထိုသို့ သတိပေးခြင်းကို ကျောင်းသားက မကျေမနပ်ဖြစ်ကာ ဆရာမကို အော်ဟစ်ဆဲဆိုခဲ့သဖြင့် ကျောင်းက ၎င်းကို အိမ်သို့ပြန်လွှတ်ကာ အုပ်ထိန်းသူများကို အကြောင်းကြားခဲ့သည်။
သို့သော် ခေတ္တမျှအကြာတွင် အဆိုပါကျောင်းသားသည် အိမ်မှ ဓားမအရှည်ကြီးတစ်ချောင်းကို ယူဆောင်ကာ ကျောင်းသို့ ပြန်လည်ရောက်ရှိလာပြီး ၎င်းကို သတိပေးခဲ့သည့် ဆရာမအား လူအုပ်ကြားထဲ လိုက်လံခုတ်ရန် ကြိုးစားခဲ့သည်။ ဆရာမဖြစ်သူမှာ ထိတ်လန့်တကြား ထွက်ပြေးခဲ့ရပြီး ကျောင်းသားငယ်များလည်း ကြောက်လန့်တကြား အော်ဟစ်ခဲ့ကြသည်။ နောက်ဆုံးတွင် ကျောင်းစောင့် (Caretaker) က လိမ္မာပါးနပ်စွာဖြင့် ကလေးကို ကစားကွင်းဘက်သို့ ဖျားယောင်းခေါ်ဆောင်သွားပြီးနောက် ဓားကို အသာတကြည် ချခိုင်းနိုင်ခဲ့သဖြင့် ဘေးအန္တရာယ်မရှိဘဲ ပြီးဆုံးသွားခဲ့သည်။
အရပ်ဘက်လူမှုအဖွဲ့အစည်းတစ်ခုဖြစ်သည့် Be One Foundation ၏ ဥက္ကဋ္ဌ “တွန်အော” (Ton Or Pen Nueng) ၏ ဖော်ပြချက်အရ အဆိုပါ ကလေးငယ်သည် ကျောင်းတွင် ယခင်ကတည်းက ရန်လိုတတ်သော အပြုအမူများရှိပြီး အတန်းဖော်များကို ရိုက်နှက်ခြင်း၊ ခြိမ်းခြောက်ခြင်းနှင့် အနိုင်ကျင့် ငွေတောင်းခြင်း (Bullying) များ စဉ်ဆက်မပြတ် ပြုလုပ်ခဲ့သူဖြစ်ကြောင်း သိရသည်။ ကျောင်းဘက်က ၎င်း၏မိသားစုနှင့် ဆွေးနွေးကာ အွန်လိုင်းမှသာ စာသင်ရန် (Online Learning) စီစဉ်ပေးခဲ့ဖူးသော်လည်း ကျောင်းသို့ ပြန်လာချိန်တွင် အပြုအမူများ ပိုမိုဆိုးရွားလာခဲ့ခြင်း ဖြစ်သည်။ ၎င်း၏ အန္တရာယ်ရှိသော အပြုအမူများကြောင့် ကျောင်းသားမိဘအချို့မှာ ၎င်းတို့၏ သားသမီးများကို အခြားကျောင်းများသို့ပင် ပြောင်းရွှေ့ထားခဲ့ကြရသည်။
လက်ရှိတွင် သက်ဆိုင်ရာ ကလေးသူငယ်စောင့်ရှောက်ရေး အဖွဲ့အစည်းများနှင့် ကာကွယ်ရေးအဖွဲ့များ (Multidisciplinary team) က အဆိုပါကလေးကို ကျောင်းနှင့် လူ့အဖွဲ့အစည်းအတွင်းမှ ခေတ္တခွဲထုတ်ကာ ၎င်း၏ နောက်ခံမိသားစု အခြေအနေနှင့် စိတ်ပိုင်းဆိုင်ရာ ပြဿနာများကို စနစ်တကျ စစ်ဆေးကုသပေးရန် ပြင်ဆင်နေကြသည်။
Source;Thaiger
