အင်္ဂါနေ့တွင် ရွှေတစ်အောင်စဈေးသည် အမေရိကန်ဒေါ်လာ ၃,၇၅၉.၀၂ အထိ မြင့်တက်ခဲ့ပြီးနောက် အာရှနံနက်ပိုင်း အရောင်းအဝယ်တွင် ဒေါ်လာ ၃,၇၄၃.၃၉ သို့ အနည်းငယ်ပြန်ကျဆင်းခဲ့သည်။ ဤဈေးနှုန်းမြင့်တက်မှုသည် ပြီးခဲ့သည့်အပတ်က ဗဟိုဘဏ် (Fed) မှ ၀.၂၅% အတိုးနှုန်းလျှော့ချခဲ့ပြီးနောက် ဖြစ်ပေါ်လာခြင်းဖြစ်ပြီး စျေးကွက်များက နောက်ထပ်အတိုးနှုန်းလျှော့ချမှုများ ရှိလာမည်ဟု မျှော်လင့်နေကြသည်။
အမေရိကန်ဒေါ်လာတန်ဖိုး ၀.၁% ကျဆင်းခဲ့ခြင်းသည်လည်း နိုင်ငံခြားဝယ်လက်များအတွက် ရွှေကို ပိုမိုစျေးပေါစေခြင်းဖြင့် ဈေးနှုန်းတက်ရန် အရှိန်ပေးခဲ့သည်။ ဒီဇင်ဘာရွှေအနာဂတ်စာချုပ်ဈေးနှုန်းများသည်လည်း ၀.၁% တက်လာပြီး အမေရိကန်ဒေါ်လာ ၃,၇၇၉.၅၀ သို့ ရောက်ရှိခဲ့သည်။
OANDA မှ သုတေသီများက ရေတိုအလားအလာသည် ဆက်လက်မြင့်တက်နေမည်ဖြစ်သော်လည်း အမြတ်ထုတ်ရောင်းချမှုများကြောင့် တစ်ရက်တာအတွင်း ဈေးနှုန်းအနည်းငယ်ပြန်ကျနိုင်ကြောင်း ပြောသည်။ အဓိကထောက်ပံ့မှုအဆင့်များကို ဒေါ်လာ ၃,၇၁၀ နှင့် ဒေါ်လာ ၃,၆၉၀ တွင် တွေ့မြင်ရသည်။
ဗဟိုဘဏ်သည် နောက်ငါးပတ်အတွင်း ၎င်း၏မူဝါဒကို ပြန်လည်စစ်ဆေးရန်ရှိပြီး အသစ်ခန့်အပ်ထားသည့် ဘဏ်အုပ်ချုပ်ရေးမှူး Stephen Miran က ဥက္ကဋ္ဌ Jerome Powell နှင့်အတူ လာမည့်အစည်းအဝေးများတွင် ပူးပေါင်းပါဝင်မည်ဖြစ်သည်။ Powell ၏ ယနေ့ညမိန့်ခွန်းကို ပိုမိုရှင်းလင်းသော လမ်းညွှန်မှုများအတွက် အနီးကပ်စောင့်ကြည့်နေကြသည်။ Miran သည် အလုပ်အကိုင်များကို ထောက်ပံ့ရန်အတွက် အတိုးနှုန်းများကို လျင်မြန်စွာ လျှော့ချရန် တိုက်တွန်းခဲ့သော်လည်း အခြားအရာရှိများက ငွေကြေးဖောင်းပွမှုအန္တရာယ်များကို လျှော့မတွက်ရန် သတိပေးနေကြသည်။
CME FedWatch Tool အရ ရင်းနှီးမြှုပ်နှံသူများသည် အောက်တိုဘာလတွင် နောက်ထပ် ၀.၂၅% လျှော့ချရန်အတွက် ၉၀% အခွင့်အရေးရှိပြီး ဒီဇင်ဘာလတွင် နောက်ထပ်လျှော့ချရန်အတွက် ၇၅% အလားအလာရှိကြောင်း တွေ့မြင်ရသည်။
ANZ ဘဏ်က ကမ္ဘာ့စီးပွားရေးနှေးကွေးလာမှု၊ ငွေကြေးဖောင်းပွမှုဆက်လက်ရှိနေခြင်း၊ ဒေါ်လာတန်ဖိုးကျဆင်းမှုနှင့် ပထဝီနိုင်ငံရေးတင်းမာမှုများက ရွှေ၏ဝယ်လိုအားကို မြှင့်တင်ပေးနေကြောင်း မှတ်ချက်ပြုခဲ့သည်။
ဘဏ်က ငွေဈေးသည် ၀.၉% ကျဆင်းကာ တစ်အောင်စလျှင် ဒေါ်လာ ၄၃.၆၇ သို့ ရောက်ရှိခဲ့သော်လည်း ရွှေ၏ဝယ်လိုအားကြောင့် ငွေကိုပါ လှုံ့ဆော်နိုင်ကြောင်း ထပ်လောင်းပြောကြားခဲ့သည်။ ပလက်တီနမ်သည် ၀.၃% ကျဆင်းပြီး ဒေါ်လာ ၁,၄၁၂.၈၀ သို့ရောက်ရှိခဲ့ပြီး palladium မှာ ၀.၂% ကျဆင်းကာ ဒေါ်လာ ၁,၁၇၆.၄၄ သို့ ရောက်ရှိခဲ့ပါသည်။
Source: The Nation Thailand
