ဘန်ကောက်၊ ထိုင်း — ထိုင်းဘတ်ငွေတန်ဖိုး အရှိန်အဟုန်ဖြင့် ခိုင်မာလာခြင်းကို လျှော့ချရန်အတွက် ထိုင်းဗဟိုဘဏ် (BOT) သည် ရွှေရောင်းဝယ်မှုမှတစ်ဆင့် နိုင်ငံခြားငွေစီးဝင်မှုများကို ပိုမိုတင်းကျပ်စွာ စစ်ဆေးတော့မည်ဖြစ်ကြောင်း ကြေညာလိုက်သည်။
ဒီဇင်ဘာ ၁ ရက်မှ ၁၆ ရက်အတွင်း ဘတ်ငွေသည် ဒေသတွင်းငွေကြေးများထက် ၂.၂% ခိုင်မာလာခဲ့သည်။အထူးသဖြင့် အွန်လိုင်း Application များမှတစ်ဆင့် “ရွှေစာချုပ် (Paper Gold)” အရောင်းအဝယ်ပြုလုပ်မှုသည် ထိုင်းနိုင်ငံ GDP ၏ ၄၀-၅၀% အထိ ရှိနေသည်။ဘတ်ငွေ အလွန်အမင်းတက်သည့်နေ့များတွင် ရွှေကုန်သည်ကြီးများ၏ နိုင်ငံခြားငွေလဲလှယ်မှုသည် ဈေးကွက်တစ်ခုလုံး၏ ၂၀% ခန့်အထိ ရှိနေသဖြင့် ဘတ်ငွေအပေါ် ဖိအားဖြစ်စေသည်။
ဗဟိုဘဏ်၏ ထိန်းချုပ်မှုအသစ်များ
စာရွက်စာတမ်းစစ်ဆေးခြင်း: ရွှေကုန်သွယ်မှုနှင့် ဆက်စပ်သည့် နိုင်ငံခြားငွေလဲလှယ်မှုအားလုံးအတွက် စီးပွားရေးဘဏ်များက စာရွက်စာတမ်းများကို အသေးစိတ် စစ်ဆေးရမည်။
ငွေရင်းမြစ်တင်ပြခြင်း: ဒေါ်လာများကို နိုင်ငံအတွင်းသို့ ယူဆောင်လာပါက ငွေကြေး၏ အရင်းအမြစ်ကို ရှင်းလင်းစွာ ဖော်ပြရမည်။
ပြင်းထန်သော အရေးယူမှုမရှိ: ယခင် (၂၀၁၀ ခုနှစ်) ကဲ့သို့ အခွန်တိုးခြင်း သို့မဟုတ် ငွေကြေးစီးဆင်းမှု ပိတ်ဆို့ခြင်းကဲ့သို့ ပြင်းထန်သော နည်းလမ်းများကိုမူ အသုံးမပြုပါဟု ဆိုသည်။
Crypto နှင့် USDT: USDT အရောင်းအဝယ်ကြောင့် ဘတ်ငွေတက်ခြင်းမဟုတ်ကြောင်းနှင့် Crypto ငွေကြေးစီးဆင်းမှုများကိုလည်း Travel Rule အရ စောင့်ကြည့်သွားမည်ဖြစ်သည်။
ဗဟိုဘဏ်အုပ်ချုပ်ရေးမှူး Vitai က SME လုပ်ငန်းများ၏ မပေးဆပ်နိုင်သောကြွေးမြီ (NPL) မှာ ၈-၉% အထိ ရှိနေပြီး အန္တရာယ်ရှိသော အဆင့်ဖြစ်သည့် ၁၅-၁၆% သို့ ရောက်ရှိနိုင်ကြောင်း သတိပေးထားသည်။ စီးပွားရေးသည် ကုမ္ပဏီကြီးများသာ ကောင်းမွန်ပြီး အခြေခံလူတန်းစားနှင့် SME များ ရုန်းကန်နေရသည့် K-shaped recovery ဖြစ်နေသည်ဟု ဆိုသည်။
လာမည့် ဒီဇင်ဘာ ၂၂ ရက်တွင် ရွှေကုန်သည်များအသင်းနှင့် ဗဟိုဘဏ်တို့ တွေ့ဆုံကာ ဤကိစ္စရပ်များကို အသေးစိတ် ညှိနှိုင်းဆွေးနွေးသွားမည် ဖြစ်သည်။
Source: Nation Thailand
