ထိုင်းဘတ်ငွေတန်ဖိုး အဆမတန်တက်နေမှုကို ထိန်းချုပ်ရန် အွန်လိုင်းရွှေကုန်သွယ်မှုအပေါ် အခွန်ကောက်ခံဖို့ စီစဉ်

ဘန်ကောက်၊ ထိုင်း — ထိုင်းဘတ်ငွေတန်ဖိုး အရှိန်အဟုန်ဖြင့် မြင့်တက်နေခြင်းကြောင့် ပို့ကုန်ကဏ္ဍကို ထိခိုက်လာမှုကို ကုစားရန်အတွက် အွန်လိုင်းရွှေအရောင်းအဝယ် (Online Gold Trading) များအပေါ် အခွန်ကောက်ခံရန်နှင့် အရောင်းအဝယ်ပမာဏကို ကန့်သတ်ရန် ထိုင်းဘဏ္ဍာရေးဝန်ကြီးဌာနက စတင်လေ့လာနေပြီဖြစ်သည်။

ယနေ့ (အင်္ဂါနေ့) တွင် ပြုလုပ်သည့် ဘဏ္ဍာရေးဝန်ကြီးဌာနနှင့် ထိုင်းဗဟိုဘဏ် (BOT) တို့၏ အစည်းအဝေးအပြီးတွင် အောက်ပါအချက်များကို ထုတ်ပြန်ခဲ့သည်-

ဘတ်ငွေတန်ဖိုးသည် ယခုနှစ်အတွင်း အမေရိကန်ဒေါ်လာနှင့်လဲလှယ်ရာတွင် ၁၀% ခန့် မြင့်တက်ခဲ့ပြီး အာရှတွင် စွမ်းဆောင်ရည်အကောင်းဆုံး ငွေကြေးဖြစ်လာသည်။ ဤသို့တက်ခြင်းမှာ စီးပွားရေးအခြေခံအချက်အလက်များကြောင့်မဟုတ်ဘဲ “ကြီးမားလွန်းသော” အွန်လိုင်းရွှေကုန်သွယ်မှုများကြောင့်ဖြစ်သည်ဟု ဗဟိုဘဏ်က ယူဆသည်။

ဘတ်ငွေတန်ဖိုးတက်ခြင်းကြောင့် ထိုင်းနိုင်ငံ၏ အဓိကဝင်ငွေဖြစ်သော ပို့ကုန်လုပ်ငန်းများ အခက်တွေ့နေရသည်။

“ရွှေကုန်သွယ်မှုအပေါ် ထိန်းချုပ်တဲ့ နည်းလမ်းတွေက ဘတ်ငွေတန်ဖိုး အဆမတန်တက်နေတာကို လျှော့ချပေးနိုင်လိမ့်မယ်လို့ ကျွန်တော်တို့ မျှော်လင့်ပါတယ်။ ဒါပေမဲ့ ရင်းနှီးမြှုပ်နှံမှု ငွေကြေးစီးဆင်းမှုတွေကိုတော့ အကြီးအကျယ် ထိခိုက်စေမယ့် နည်းလမ်းတွေကို သုံးဖို့ အစီအစဉ်မရှိပါဘူး။”

ဘတ်ငွေတန်ဖိုးသည် လက်ရှိတွင် ၄ နှစ်ကျော်အတွင်း အမြင့်ဆုံးအဆင့်သို့ ရောက်ရှိနေသဖြင့် အစိုးရအနေဖြင့် ဈေးကွက်ကို ပြန်လည်တည်ငြိမ်အောင် ကြိုးပမ်းနေခြင်းဖြစ်သည်။

Source: Bangkok Post