ယနေ့ (၂၀၂၆ ခုနှစ်၊ ဇွန်လ ၁၂ ရက်) သတင်းထုတ်ပြန်ချက်များအရ ထိုင်းအကောက်ခွန်ဌာနသည် နခွန်ရက်ချာဆီမာ (ကိုရတ်) ခရိုင်မြို့လယ်ရှိ လူငယ်များအကြား အလွန်ရေပန်းစားပြီး ၂၄ နာရီနီးပါး ဖွင့်လှစ်ထားသည့် နာမည်ကြီး နိုင်ငံခြားခေါက်ဆွဲဆိုင် (Foreign Noodle Cafe) ကြီးတစ်ခုကို တရားရုံးရှာဖွေဝရမ်းဖြင့် ဝင်ရောက်စီးနင်းခဲ့ရာ၊ ထိုင်းအစားအသောက်နှင့် ဆေးဝါးကွပ်ကဲရေးဦးစီးဌာန (FDA) ခွင့်ပြုချက်မရှိဘဲ တရားမဝင်မှောင်ခိုတင်သွင်းထားသည့်အပြင် သက်တမ်းကုန်ဆုံးလုနီးပါးဖြစ်နေသော အစားအသောက်ကုန်ကြမ်းပစ္စည်းပေါင်း ၂,၀၀၀ နီးပါး ကို ရှော့ခ်ရဖွယ် ရှာဖွေပုံစံသိမ်းဆည်းရမိခဲ့ပါတယ်။
ချောင်ချွန် (Chong Chom) အကောက်ခွန်ရုံးမှူး မစ္စတာ ပရာဆစ် (Mr. Prasit Deejongcharoen) ၏ ပြောကြားချက်အရ အဆိုပါဆိုင်သည် ဖွင့်လှစ်ထားသည်မှာ ၃ နှစ်ခန့်ရှိပြီဖြစ်ပြီး ဒေသခံလူငယ်များ အမြဲမပြတ် လာရောက်စားသောက်သည့် ဆိုင်ကြီးဖြစ်သည်။ သို့သော် ဆိုင်အတွင်း၌ သံသယဖြစ်ဖွယ် လှုပ်ရှားမှုများရှိနေကြောင်း ထောက်လှမ်းရေးသတင်းရရှိသဖြင့် ကိုရတ်ခရိုင်တရားရုံးထံမှ ရှာဖွေဝရမ်းရယူကာ ဝင်ရောက်စီးနင်းခဲ့ခြင်းဖြစ်သည်။
ဆိုင်အတွင်းမှ တရားမဝင် မှောင်ခိုသွင်းလာသည့် အင်စတန့်ခေါက်ဆွဲများ၊ ဟင်းခတ်မှုန့်များနှင့် ဆော့စ်များ၊ အအေးမျိုးစုံနှင့် မုန့်ပစ္စည်းများ အပါအဝင် စုစုပေါင်း ကုန်ပစ္စည်းအရေအတွက် ၂,၀၀၀ နီးပါးကို သိမ်းဆည်းခဲ့သည်။
ပိုမိုဆိုးရွားသည်မှာ မိမိတို့သိမ်းဆည်းရမိသည့် ကုန်ကြမ်းသိုလှောင်မှု၏ ထက်ဝက်နီးပါး (၅၀ ရာခိုင်နှုန်းခန့်) မှာ သက်တမ်းကုန်ဆုံးရန် ရက်ပိုင်းသာလိုတော့သည့် (Nearly Expired) ပစ္စည်းများဖြစ်နေသဖြင့် စားသုံးသူလူငယ်များအတွက် ကျန်းမာရေးအရ အလွန်အန္တရာယ်ကြီးမားလှပြီး ယခုကဲ့သို့ စီးပွားရေးသမားများ၏ တာဝန်မဲ့မှုမှာ လူမှုအသိုင်းအဝိုင်းအတွက် ကြီးမားသော ခြိမ်းခြောက်မှုဖြစ်ကြောင်း အကောက်ခွန်ဌာနက ဆိုသည်။
ထိုင်းအကောက်ခွန်ဌာန ညွှန်ကြားရေးမှူးချုပ် မစ္စတာ ဖန်ထောင် (Phanthong Loykulnan) ၏ လမ်းညွှန်ချက်အရ အီဆန်တောင်ပိုင်းဒေသ ၃ ခရိုင် (ဆူရင်၊ ဘူရီရမ် နှင့် စီးပွားရေးအချက်အချာ ကိုရတ်ခရိုင်) အတွင်း စားသုံးသူပြည်သူများ ကျန်းမာရေးထိခိုက်မှုမရှိစေရန်နှင့် တရားဝင်ရိုးသားစွာ လုပ်ကိုင်နေသည့် စီးပွားရေးလုပ်ငန်းရှင်များ နစ်နာမှုမရှိစေရန်အတွက် မှောင်ခိုကုန်ပစ္စည်းများနှင့် အတုအပများကို အထူးတင်းကြပ်စွာ ဆက်လက်ဖော်ထုတ် ဖမ်းဆီးသွားမည်ဖြစ်သည်။
Source;Thairath
