ရွှေဆိုင်များတွင် ငွေသားဖြင့် ရွှေချောင်းဝယ်ယူမှု ပမာဏ ကန့်သတ်ရန် ထိုင်းဗဟိုဘဏ် လူထုသဘောထား တောင်းခံ

ထိုင်းဘတ်ငွေ လဲလှယ်နှုန်း တည်ငြိမ်ရေး၊ ငွေကြေးစီးဆင်းမှု ပွင့်လင်းမြင်သာရေးနှင့် မှောင်ခိုငွေကြေး စီးဆင်းမှုများကို တားဆီးရန်အတွက် ထိုင်းဗဟိုဘဏ် (Bank of Thailand) သည် ရွှေဆိုင်များတွင် ငွေသားဖြင့် သီးသန့် ရွှေချောင်း ရောင်းဝယ်မှုကို ပမာဏကန့်သတ်ရန် စည်းမျဉ်းသစ်များ အဆိုပြုထားပြီး အများပြည်သူ၏ သဘောထား အမြင်များကို စတင်တောင်းခံနေပါတယ်ဗျာ။ အဆိုပါ သဘောထားတောင်းခံမှုကို ဩဂုတ်လ ၂၀ ရက်နေ့အထိပြုလုပ်သွားမည်ဖြစ်သည်။
🪙 အဆိုပြုထားသည့် ငွေသား သုံးစွဲခွင့် ပမာဏ ကန့်သတ်ချက်များ
▪️ရွှေဆိုင်နှင့် တစ်ဦးချင်း ဝယ်ယူသူများအကြား: ရွှေဆိုင်တစ်ဆိုင် သို့မဟုတ် ဘဏ်ခွဲတစ်ခုတွင် တစ်ဦးလျှင် တစ်ရက်လျှင် ဘတ် ၁ သန်းမှ ၁၀ သန်းကြား အထိသာ ငွေသားဖြင့် ဝယ်ယူခွင့်ပြုရန်။
▪️ရွှေဆိုင်များ (ရွှေကုန်သည်များ) အချင်းချင်း ရောင်းဝယ်မှု: တစ်ရက်လျှင် ဘတ် သန်း ၁၀ မှ သန်း ၈၀ ကြား အထိသာ ငွေသားဖြင့် သုံးစွဲခွင့်ပြုရန်။
▪️ပင်ကိုယ်တိုင် လွှဲပြောင်းရမည်: ဝယ်ယူသူများအနေဖြင့် ရွှေချောင်းများကို ကိုယ်တိုင်ကိုယ်ကျ သွားရောက်ထုတ်ယူခြင်း သို့မဟုတ် သွားရောက်ပို့ဆောင်ပေးခြင်းများ ပြုလုပ်ရမည်ဖြစ်သည်။
🔍 ဘတ်ငွေ တည်ငြိမ်ရေးနှင့် မသင်္ကာဖွယ် ငွေကြေး စိစစ်ရေး
▪️အရောင်းအဝယ် ပမာဏကို ကန့်သတ်ခြင်းမဟုတ်ပါ: ယခု စည်းမျဉ်းသည် ရွှေရောင်းဝယ်သည့် ပမာဏစုစုပေါင်းကို ကန့်သတ်ခြင်းမဟုတ်ဘဲ သတ်မှတ်ထားသည့် ပမာဏထက် ကျော်လွန်ပါက ဘဏ်အကောင့်မှတစ်ဆင့် စစ်ဆေးရလွယ်ကူသော (Traceable) အီလက်ထရွန်နစ် ငွေပေးချေမှုစနစ်များကိုသာ သုံးစွဲရန် တောင်းဆိုခြင်းဖြစ်သည်။
▪️အွန်လိုင်း ရွှေရောင်းဝယ်မှု ကန့်သတ်ချက်များ: ပြီးခဲ့သည့် မတ်လမှစ၍ အွန်လိုင်း ရွှေရောင်းဝယ်မှုများကို တစ်ဦးလျှင် တစ်ရက်လျှင် ဘတ် သန်း ၅၀ အထိ ကန့်သတ်ထားပြီး ဖြစ်သည်။
▪️ငွေသား ၅ သန်းအထက် အပ်နှံသူများ စိစစ်မည်: ထို့ပြင် လာမည့် အောက်တိုဘာလ ၁ ရက်နေ့မှစ၍ ဘဏ်များတွင် ငွေသား ဘတ် ၅ သန်းထက်မက လာရောက်အပ်နှံသူများအနေဖြင့် ငွေကြေးရရှိသည့် လမ်းကြောင်း (Source of funds) ကို မဖြစ်မနေ ထုတ်ဖော်ပြောကြားရမည်ဖြစ်သည်။

Source;Bangkok Post