ထိုင်းနိုင်ငံတောင်ပိုင်း၊ နရာသီဝတ် (Narathiwat) ခရိုင်၊ တာ့ဘိုင် (Tak Bai) မြို့နယ်ရှိ PT ဓာတ်ဆီဆိုင်တစ်ခုတွင် အောက်တိုဘာ ၁ ရက် ညပိုင်းက ဘေးတွဲဆိုင်ကယ်အတွင်း ထောင်ထားသည့် လက်လုပ်ဗုံး (IED) ပေါက်ကွဲမှုဖြစ်ပွားခဲ့သဖြင့် ဆီဆိုင်ဝန်ထမ်း ၂ ဦး ထိခိုက်ဒဏ်ရာ ရရှိသွားခဲ့ကြောင်း သိရပါတယ်။
အောက်တိုဘာ ၁ ရက် ည ၉:၀၀ နာရီခန့်တွင် တာ့ဘိုင်မြို့နယ်၊ ဂျဲဟဲ (Jehae) ကျေးရွာအုပ်စု၊ အဝေးသင် လမ်းမကြီး ၄၃၂၇ ပေါ်ရှိ PT ဓာတ်ဆီဆိုင်၌ ဗုံးပေါက်ကွဲမှု ဖြစ်ပွားခဲ့ခြင်းဖြစ်သည်။
မျက်မြင်တွေ့ရှိသူများ၏ ထွက်ဆိုချက်အရ အမည်မသိ အမျိုးသားတစ်ဦးသည် ဘေးတွဲဆိုင်ကယ်အား ဓာတ်ဆီဆိုင်ရှေ့တွင် လာရောက်ရပ်တန့်ခဲ့ပြီးနောက် အဆိုပါနေရာမှ အလျင်အမြန် ထွက်ခွာသွားခဲ့သည်။ ထို့နောက် မကြာမီအချိန်အတွင်း ဘေးတွဲအတွင်း ဝှက်ဧရိယာ၌ ထောင်ထားသည့် လက်လုပ်ဗုံး (IED) စတင် ပေါက်ကွဲခဲ့ခြင်းဖြစ်သည်။
ပေါက်ကွဲမှုကြောင့် PT ဆီဆိုင်မှ ဝန်ထမ်း ၂ ဦး သာမန် ဒဏ်ရာများ (Slight injuries) ရရှိခဲ့ပြီး၊ ၎င်းတို့အား တာ့ဘိုင် မြို့နယ်ဆေးရုံသို့ အရေးပေါ် ပို့ဆောင်ကုသပေးခဲ့ကာ ဆေးကုသမှု ခံယူပြီးနောက် ဆေးရုံမှ ပြန်လည်ဆင်းခွင့် ရရှိခဲ့ကြသည်။
သတင်းရရှိသည်နှင့်တစ်ပြိုင်နက် လုံခြုံရေးတပ်ဖွဲ့ဝင်များ အခင်းဖြစ်ပွားရာနေရာသို့ အမြန်ဆုံး ရောက်ရှိလာခဲ့ပြီး နောက်ထပ် ဗုံးအန္တရာယ် ရှိမရှိ စစ်ဆေးနိုင်ရန်အတွက် PT ဓာတ်ဆီဆိုင်နှင့် အနီးဝန်းကျင် ဧရိယာများကို လုံခြုံရေးအရ ပိတ်ဆို့ (Cordon off) ခဲ့သည်။
ဗုံးရှင်းလင်းရေး တပ်ဖွဲ့ဝင်များ (EOD Unit) က အဆိုပါ ဧရိယာအတွင်း ထပ်မံထောင်ထားသည့် မသင်္ကာဖွယ် ပစ္စည်းများ ရှိမရှိ အသေးစိတ် ရှာဖွေစစ်ဆေးမှုများ ဆောင်ရွက်ခဲ့ကြပြီး ပျက်စီးသွားသည့် ဘေးတွဲဆိုင်ကယ် အပျက်အစီးများကို သက်သေခံပစ္စည်းအဖြစ် သိမ်းဆည်းခဲ့သည်။
သက်ဆိုင်ရာ လုံခြုံရေးအာဏာပိုင်များက ဖြစ်စဉ်တွင် ပါဝင်သူနှင့် တိုက်ခိုက်မှု နောက်ကွယ်မှ ကျူးလွန်သူများကို ဖော်ထုတ်ဖမ်းဆီးနိုင်ရန်အတွက် စုံစမ်းစစ်ဆေးမှုများ အရှိန်အဟုန်မြှင့် ဆောင်ရွက်လျက်ရှိသည်။
Source;ThaiPBS
