ပြီးခဲ့သည့်ရက်ပိုင်းက ထိုင်းအွန်လိုင်း အသုံးပြုသူများအကြား နာမည်ကြီးနေသည့် ရဲတပ်ဖွဲ့ဝင် Content Creator တစ်ဦးဖြစ်သူ ရဲအရာရှိ ဂျက် (Sergeant Jak) ၏ ဖေ့စ်ဘွတ်ခ်စာမျက်နှာ ရုတ်တရက် ပျောက်ကွယ်သွားခဲ့သည်။
ထိုသို့ ပိတ်သိမ်းသွားခြင်းသည် လတ်တလော လမ်းမပေါ်တွင် ဖြစ်ပွားခဲ့ပြီး အငြင်းပွားဖွယ်ရာ ဖြစ်နေသည့် နောက်တွဲကုန်တင်ကားကြီး တစ်စီး၏ မတော်တဆမှု ဖြစ်စဉ်အပေါ် ၎င်းက ဝင်ရောက်ဝေဖန် မှတ်ချက်ပေးခဲ့ခြင်းကြောင့် ဖြစ်နိုင်ကြောင်း သတင်းကောလာဟလများ ကျယ်ကျယ်ပြန့်ပြန့် ထွက်ပေါ်ခဲ့ရာမှ ၎င်းကိုယ်တိုင် မီဒီယာများရှေ့ ထွက်လာပြီး တုံ့ပြန်ခဲ့ခြင်း ဖြစ်သည်။
ရဲတပ်ကြပ်ကြီး ဂျက်၏ ပြောကြားချက်အရ ၎င်း၏ စာမျက်နှာကို ပိတ်လိုက်ရခြင်းမှာ အွန်လိုင်းပေါ်တွင် စိတ်အနှောင့်အယှက်ဖြစ်စရာ အချက်အချို့ ရှိလာခြင်းနှင့် မိသားစုရေးရာ၊ ရုံးလုပ်ငန်း တာဝန်ဝတ္တရားများအပေါ် ပိုမိုအာရုံစိုက်လိုခြင်း စသည့် ကိုယ်ရေးကိုယ်တာ အကြောင်းပြချက်များကြောင့်သာ ဖြစ်ပြီး မည်သည့်အဖွဲ့အစည်း သို့မဟုတ် အထက်လူကြီးများ၏ ဖိအားပေးမှုမျှ မပါဝင်ကြောင်း ဆိုသည်။
၎င်းက အဆိုပါ နောက်တွဲတွဲကား မတော်တဆမှု တွင် ၎င်းအနေဖြင့် နောက်ကွယ်က ပါဝင်ပတ်သက်နေခြင်း သို့မဟုတ် တရားခံဘက်က လိုက်လံကူညီပေးနေခြင်း စသည့် စွပ်စွဲချက်များမှာ လုံးဝ မဟုတ်မမှန်ကြောင်းနှင့်၊ “ကျွန်တော့်အနေနဲ့ အဲဒီဖြစ်စဉ်ကို သတင်းထဲမှာပဲ မြင်ဖူးတာပါ၊ ဇာတ်ကောင်တွေနဲ့လည်း ဘာအဆက်အသွယ်မှ မရှိပါဘူး” ဟု ပြတ်သားစွာ ပြောဆိုခဲ့သည်။
မဟုတ်မမှန် သတင်းအမှားများ ဖြန့်ဝေပြီး ၎င်း၏ ရဲတပ်ဖွဲ့ဝင် ဂုဏ်သိက္ခာကို ညှိုးနွမ်းအောင် လုပ်ဆောင်နေသည့် အွန်လိုင်းအကောင့်များနှင့် သတင်းစာမျက်နှာအချို့ကို ကွန်ပျူတာအက်ဥပဒေ (Computer Act) အရ တရားစွဲဆို အရေးယူနိုင်ရန်အတွက် သက်သေအထောက်အထားများ စုဆောင်းနေပြီဖြစ်ကြောင်းလည်း သတိပေးခဲ့သည်။
ဤကိစ္စနှင့် ပတ်သက်၍ ရဲတပ်ကြပ်ကြီး ဂျက်၏ သက်ဆိုင်ရာ နယ်မြေရဲစခန်း အကြီးအကဲကလည်း ၎င်းတို့၏ ဝန်ထမ်းသည် စည်းကမ်းလိုက်နာသူတစ်ဦးဖြစ်ပြီး လက်ရှိတွင် ပုံမှန်တာဝန်များကို ဆက်လက်ထမ်းဆောင်နေကြောင်း၊ အွန်လိုင်းပေါ်မှ ကိစ္စရပ်များသည် ၎င်း၏ ရုံးလုပ်ငန်းအပေါ် သက်ရောက်မှု မရှိကြောင်း ထုတ်ဖော်ပြောဆိုထားသည်။
သို့သော်လည်း အွန်လိုင်းစုံထောက်များနှင့် ထိုင်းအသုံးပြုသူအချို့ကမူ ဤမျှ နာမည်ရနေသည့် Page တစ်ခုကို အကြောင်းပြချက် မခိုင်လုံဘဲ ရုတ်တရက် ပိတ်ပစ်လိုက်ခြင်းမှာ တွဲကားဖြစ်စဉ် နောက်ကွယ်ရှိ အရှိန်အဝါကြီးသူ အချို့နှင့် ပတ်သက်နေနိုင်သေးသည်ဟု ယူဆကာ ဆက်လက် စောင့်ကြည့်ဝေဖန်လျက် ရှိကြသည်။
Source;Thairath
